Rumeli Vâlîsi'nin ʿuhdesine ihâle olunun hatb-ı cesîm-i Serʿaskerî takrîbi ile müstedʿiyyâtına müsâʿade lâzım ve zararı gayr-i muhayyel olan mes'ûlâtına mümâşât emr-i mühimm görüldüğüne binâ'en, mahdûmu Muhtâr Paşa'nın Tırhala ile bekâm olması tarafından istirhâm ve Paşa-yı mûmâ ileyh dahi fi'l-hakīka maslahat-ı hatîre üzerinde bulunup, sezây-ı lutf [V 8b] u ikrâm olduğu Kapudan Paşa hazretleri tarafından ifade vü ifhâm olunmağla, mansıb-ı mezkûr şehr-i Rebîʿulevvel evâsıtında bâ-hatt-ı hümâyûn Paşa-yı mûmâ ileyhe tevcîh ve emr-i şerîfi ısdâr olunmak tenbîh olunmuşidi. Sadrıaʿzam ve bedr-i efham hazretlerinin bi'l-fevzi ve'z-zafer Âsitâne-i saʿâdet'e tekarrübleri mukarrer olup, tevcîh-i menâsıb ve tertîb-i merâtib kudûmlarına taʿlîk olunmak müreccah u münâsib olduğunu Kāyim-makām Paşa hazretleri işrâb ve te'hîrini istisvâb etmişidi. Kapudan Paşa hazretleri mansıb-ı mezkûrun te'hîrinde [Ü4 137b] harec olduğunu te'emmül ve Bâb-ı ʿâlî'ye gelüp, sebeb-i te'ahhur u teʿallül n'olduğunu tekavvül edüp, ʿözr-i mezkûr Kāyim-makām Paşa tarafından îrâd ve anlar dahi te'hîr husûsunda baʿzı mazarrat taʿdâdıyla muʿâraza vü ilzâm tarafına istinâd ve hemân o meclisde Re'îsülküttâb Efendi'yi ihzâr ve hatt-ı şerîf mûcebince Tırhala'nın tevcîh emrini ısdâr ve inkızây-ı mâdde ʿakībinde Tersâne'ye güzâr buyurdular. Müşârun ileyhimâ hazerâtının dikkat olunsa, birer cihetle hakk yedlerinde olup, münâkaşaları min-tarîkı'l-ictihâd yine vikāye-i nâmûs-ı devlete çıkacağı maʿlûm-i erbâb-ı fetânet ü istiʿdâddır.