Dergâh-ı ʿâlî kapucu-başılarından sâbıkā Erzurum Gümrükcüsü Esʿad Ağa, Hakkı Paşa tarafdârlığıyla meşhûr ve baʿzı [Ü4 130b] nâ-sezâ mükâtebât ile kadh u zemm-i evliyây-ı umûr eylediği, sâmia-res-i Şehriyâr-ı kâmilü'ş-şuʿûr olup, işbu Muharrem evâyilinde Kapucu-başılığı kaydı terkīn ü ilgā ve İstanköy Cezîresi'ne nefy ü iclâ olunup, sâbıkā Muhâsebe-i Evvel Feyzî Bey-zâde Mehmed Bey dahi, müşârun ileyhin baʿzı tahrîrâtını mahallerine nakl ve muhassenâtdan ʿadd eylediği efʿâlini zikr ile mütehhem olduğundan, mukaddemâ Üsküdâr'da istîcâr eylediği hânenin insidâd-ı der ü dervâzesiyle mukayyed-i dü-şâha-i te'dîb ü tenkîb ve birkaç gün murûrunda iltimâsât-ı şüfeʿâ ile vâreste-i ʿitâb u tesrîb oldu. Nazm: Kem-sâkitin nâle'l-münâ bi-sükûtihî / Ve kem-nâtıkın yecnî ʿaleyhi lisânühû