Bir müddetden berü Emîrü'l-Hâcc olan ʿAzm-zâde Vezîr ʿAbdullah Paşa'nın diyâr-ı Şâmât'da olan mezâlim ü teʿaddiyyatı hadden efzûn ve ʿale'l-husûs hüccâc-ı zevi'l-ibtihâca eylediği eziyyet-i [Ü4 130a] gûnâ-gûn, râdde-i taʿbîrden bîrûn olduğundan fazla, Mısır ordusuna müretteb zehâyir ve bazı tahsîlâta itâle-i dest-i taʿarruz u müdahale ve mukavvimîn [Ü3 208b] ve sayir erbâb-ı ihtikâr ile hafîce mukāvele ile irtikâb-ı sû'-i muʿâmele eylediği, refte refte sâmiʿa-i hümâyûna ilkā ve mâdde-i mezkûre Sadrıaʿzam ve Serdar-ı ekrem hazretleri tarafından dahi îmâ olunmuşidi. O havâlîde Emâret-i Hâcc idâresine muktedir vüzerâ maʿdûm ve Kudüs Muhafızı Vezîr Mehmed Paşa'nın dahi hudûs-i vakt ve henûz dâyiresi muntazam olmamak ʿilletleriyle nasbı, taraf-ı Sadâret-penâhî'den müstasveb olmadığı muharrer ü merkūm olmuş ise dahi, muktezây-ı hâle nazaran müşârun ileyhden evlâ o taraflarda bir Vezîr olmadığı zâhir ü hüveydâ olup, işbu Muharremü'l-harâm evâhırında Şâm Eyâleti'yle Emâret-i Hâcc, müşârun ileyhe şeref-yâfte-i sudûr olan hatt-ı hümâyûn mûcebince tevcîh ü ʿinâyet ve Kapu Kethudâsı Şehr-emîni es-Seyyid Mehmed Efendi'ye ilbâs-ı hilʿat olundu.