Arnabud tâyifesi bir müddetden berü cerâd-ı münteşir gibi Rumeli memâlikine yayılup, gâh dağluya tebaʿiyyet ve gâh aʿyânlara şehriyye-i girân ile hıdmet ve'l-hâsıl kim ziyâde şeyʾ ʿarz ederse, bilâ-tereddüd icâbet eylediklerinden, fevâyid-i Rumeli'ye mâlik ve bu sebeble ru'esâları iktinây-ı emvâle mütehâlik olmalarıyla, cizye ve ʿavârız ve sâyir mürettebât-ı devlete halel târî olduğundan, nazarı katʿ ile reʿâyâ, hars ü zirâʿat ve tüccâr, mekâsib-i ticaretden [Ü4 129a] ʿârî olarak leyl ü nehâr mübtelây-ı nâliş ü zârî olmuşlar idi. Etrâfda bulunan vüzerây-ı ʿizâmın kelimelerinde ihtilâf ve birbirleriyle ʿadem-i iʿtilâfları ve aʿyân makūlelerinin muhâfaza-i nefs ü mâl sevdâsıyla eşkıyâya hufyeten mümâşâtları ve bâ-husûs bâlâda ahvâli tafsîl olunan Hakkı Paşa'nın evzâʿ-ı şütür-gürbesi külliyyen Rumeli'nin nizâmına bâʿis-i halel ve maksûdun bizzât olan Pâsbân-oğlu'na vakit kazandırup, [Ü3 207b] bâzû-yı şekāvetine ʿârız olan vehn ü zaʿfın kuvvetine ʿilletü'l-ʿilel ve şakī-yi merkūm intihâz-ı fursat ile serhadd-i Belgrad'ı ifsâd ve vech-i muharrer üzere Vâlî ve sâyir kâr-güzârlarını dâyire-i hestîden ibʿâd eyleyüp, bu derd-i cân-gâha tedârük-i ʿilâc, sudûr-ı evliyây-ı umûru dem-beste-i ihtilâc eylediğinden, birkaç defʿa bu husûsât huzûr-ı hümâyûnda baʿzı havâss ile müzâkere ve Bâb-ı ʿâlî'de dahi idâre-i pergâr-ı müşâvere olunup, bilâhare tâyife-i Arnabud'un rağbeten ev rehbeten Rumeli'nden ihrâc ve mekân ü me'vâlarına celb ü idrâcları Tepedelenli Vezîr ʿAli Paşa'nın dâhil-i hayyiz-i vüsʿü iktidarı olduğu ve Rumeli Eyâleti, tarafına tevcîh olunduğu hâlde bi-meşî'etillâhi Teʿâlâ bâlâda taʿdâd olunan fesâdâtın izâlesine muvaffak olacağı hâtır-güzâr-ı uli'l-ebsâr olduğu, maʿrûz-ı ʿatebe-i Cihân-dârî kılınmağla, Rumeli Eyâleti inzımâmıyla Serʿaskerlik, tarafına ihâle vü tefvîz ve istiklâli hâvî hatt-ı hümâyûn ile müveşşah tarafına emr-i ʿâlî ısdâr ve bir sâʿat akdem Sofya taraflarına gelmek ve ʿuhdesine muhavvel olan umûr-ı şettânın tesviyesine dâmen-çîn-i ihtimâm olmak husûsları ʿale't-tafsîl me'mûriyyeti emr-i şerîfinde [Ü4 129b] derc ü işʿâr olunup, Vezîr İbrâhîm Paşa ile miyânelerinde vâkiʿ olan münâfeseyi safvete tahvîl ve şikākı vifâka tebdîl zımnında hâcegân-ı Divân-ı hümâyûn'dan Eginli Mustafa Efendi dahi o tarafa tesbîl olundu.