Kassâb-başı, Kapucu-başı Mehmed Ağa'nın şehr-i ʿömrü selh ve mezâk-ı zindegânîsi telh olup, meslah-ı dünyâdan reh-yâb ve çerâ-gâh-ı niʿam-ı âhirete pâ-cünbân-ı zehâb oldu. Münhall olan Kassâb-başılık, şehr-i Recebü'l-ferdin üçüncü günü Dergâh-ı âlî kapucu [Ü3 179b] -başılarından Bergosî Mustafa Ağa'nın gerden-i ihtimâmına taʿlîk ve selefi müteveffâ ile olan muhâsebesi cânib-i mîrîden tanzîm u tevfîk olundu. Beher sene Haremeyn-i şerîfeyn tarafına mersûl olan Surre-i hümâyûn'un ihrâcı vakti hulûl eylediğine binâʾen, şehr-i mezkûrun on ikinci günü Surre Emîni nasb olunan sâbıkā Hotin Defterdârı Mehmed Esʿad Efendi'ye mebâliğ-i mezkûre îdâ ve Üsküdar'a imrâr ve birkaç günden sonra cânib-i Hicâz'a tesyâr olundu. Bir müddetden berü Galata Voyvodası olan Ser-bostâniyân-ı sâbık Kapucu-başı Mustafa Ağa hazzını istîfâ ve Kara-hisârî Turunc Ağa-zâde Mustafa Ağa, Voyvodalık içün bast-ı keff-i recâ etmekle, niyâzı vesâtat-ı şüfeʿâ ile kabûle sezâ görülüp, evâhir-ı şehr-i Receb'de Voyvodalık hilʻati dûş-i gayretine iksâ ve vakti geldikde hıdmetini bilâ-kusûr edâ etmek tenbîhâtı zarf-ı gûşuna ilkā olundu.