Mûmâ ileyh bu defʿa dahi Edirne Bostancı-başılığı [Ü3 179a] ile kâm-yâb ve tâkati yetişdiği kadar iktizâ eden hıdemâtda dest-ber-endâz-ı râhat u hâb olmuşidi. Şîr-i jiyân'ı, sinnevr-i zaʿîf ve Rüstem-i Destân'ı, merd-i sad-sâle gibi nahîf eden fakr ve ʿadem-i servetini Rumeli Serʿaskeri zihninde tasvîr ve mütemevvilân-ı zemâneden birinin hıdmet-i mezkûrede istihdâmını re'y ü tedbîr eylediğine binâ'en, tarafına verilan istiklâl hasebiyle bilâ-istîzân Tekfür-dağı sükkânından ʿOsmân Ağa'yı Bostancı-başı nasb edüp, me'mûriyyet emr-i şerîfinin bu tarafdan tesyîrini tahrîr ve kısta'l-yevm hisâbıyla merkūmu tagrîr u tekdîr eylediğinden başka, Aynaroz tarafına tagrîb ve bu tavr-ı dil-firîb ile müteʿayyinân-ı Rumeli'yi tahvîf ü terhîb eyledi.