Bi'l-istiklâl Rumeli Serʿaskeri olan Vezîr Hakkı Mehmed [Ü3 178b] Paşa zevât-ı müteşahhısadan birinin ordusuna Defterdâr nasb olunmasını hâme-güzâr-ı iltimâs ve sâbıkā Defter Emîni Küçük Râşid Efendi'nin bu hıdmete liyâkatini erbâb-ı reʾy ü kıyâs teferrüs ü ihsâs etmekle, mûmâ ileyhe bu me'mûriyyet teklîf olundukda, izhâr-ı ‘işve vü nâz ve bilâhare Rûznâmçe-i Evvel mansıbı tarafına muvakkaten tevcîh olunmasını niyâz edüp, iltimâsı ‘arz-ı Dergâh-ı vâlâ ve: “Edirne'ye vardıkda, Hakkı Paşa yazsun" sûretinde ırzâ olunup, Cumâdelâhıre evâyilinde hilʿat iksâ ve Edirne'ye isrâ olunmuşidi. Mûmâ ileyh o tarafa vardıkda, mansıb-ı mezkûrun üzerinden sûret-i indifâʿda insırâfını anlamayup, izhâr-ı teʿâmî vü tecâhül ve müşârun ileyhe mahsûs kazıyyeyi tahrîr etdirdüp, yine bu tarafdan teʿallül olunduğunu Hakkı Paşa tehayyül edüp, ‘âdeti üzere izhâr-ı ceberût u tecâdül ve: “Bu mâddeye ʿadem-i tevassul, nüfûzuma îrâs-ı tezelzül eder" deyü tekrar husûlünü işʿâr etmekle, muktezayât-ı vakt iltizâm olunarak, mansıb-ı mezkûr muvakkaten [Ü4 102b] mûmâ ileyhe tevcîh ve ru'ûsu o tarafa tesyâr ve müşârun ileyhin iddiâ etdiği nüfûzun vikāyesine ibtidâr olundu.