Bir müddetden berü Silahdârlık câh-ı refîʿiyle ser-bülend olan İslâm Ağa'nın muhavvel-i zimmeti olan umûr-ı lâzımü'l-iʿtinâda zâhir olan kusûr ve ʿadem-i mübâlâtı ve nefsine mahsûs meclûbât zimnında kemâl-i hırs u taʿcîzâtı mûcib-i nefret-i tabʿ-ı hümâyûn olmakdan nâşî, mâh-ı mezkûrun yedinci günü ʿazl olunup, Rikâbdâr-ı hazret-i Tâc-dârî Halîl Ağa'nın tavr u reftârı müsellem ve ʿakl ü rüşd ve hüsn-i idâresi gayr-i mübhem olduğundan, Silahdârlık rütbe-i celîlesiyle mükerrem ve selefi müşârun ileyhin emsâline kıyâsen taʿyînât ile hânesinde ikāmeti fermân ve Çukadâr Ağa'nın hasbe'l-ʿâde ihrâcı lâzım geldiğinden, hâline çespân [Ü3 178a] nân-pâre vukūʿ buluncaya dek Darb-hâne-i ʿâmire'den beher mâh bin beşer yüz guruş tahsîs ü ihsân ve bu sebeble Enderûn-ı hümâyûn'da silsile vâkiʿ olup, Tophâneli İbrâhîm Ağa, Çukadâr Ağalık ile ve Sarıkçı-başı Ahmed Ağa, Rikâbdârlık ile ve Silahdâr ʿAbdurrahmân Ağa-zâde Hasan Bey, Dülbend Ağalığı'yla ve Tüfengçi-başı ʿArif Ağa, Miftâh Ağalığı'yla ve Reşîd Ahmed Bey, Pişgîr Ağalığı'yla mesrûr ve her biri hıdmet-i lâzimesini edâya meʾmûr oldu.