Mısr-ı mahrûse fethinde elçi-yi mezbûr Bâb-ı ʿâlî'ye daʿvet ve ilbâs-ı hilʿat ʿakabinde müzeyyen bir re's esb ve çiçek şeklinde mücevher bir çeleng ile tatyîb ve Sır Kâtibi ve Tercemânı ve sâyir ʿavenesi dahi hilaʿ-ı fâhire ile tatrîb olunmuşidi. Feth-i İskenderiyye haberi vürûdunda, yâ biniş mahallinde ve yâhûd Dîvân-ı ʿâlî'de resm-i tebrîk icrâsına elçi-yi mersûm tâlib ve biniş mahalli müteʿazzir olup, Dîvân'a gelmesi münâsib görüldüğünden, ber-vech-i muharrer yevm-i mezkûrda Dîvân-ı hümâyûn'a vürûd ve hâk-bûsî-yi ʿatebe-i Şâhâne ile kesb-i fahr-ı nâ-mahdûd edüp, semmûr kürk ilbâs ve devletine iʿtibâren resmden hâric olarak iltimâs eylediği donanmış esb verildiğinden başka, on bin guruş eder bir kıtʿa elmâs ile memnûn-ı lutf-i bî-kıyâs kılındı.