Fransızlar Mısr-ı Kāhire'den memleketlerine eğerçi emvâl-i kesîre ve emtiʿa-i vefîre nakl eylediler. Ancak on senede biri fenn-i harbe âşinâ olmuş ve otuz senede biri iʿmâl-i askere vukūf peydâ eylemiş kırk bin kadar müretteb ü muʿallem askerleri ve niçe zâbitân ve ceneralleri şemşîr-i zafer-te'sîre ʿalef ve niçe hazâyin ü tekellüfât ile vücûda [Ü4 90a] gelmiş donanma ve mühimmâtları zâyiʿ u telef olduğundan gayri, cumhûr mâlı olarak Mısır ve İskenderiyye ve sâyir mahallerde vâfir mühimmât ve zehâyir ve eşyâ terk etmeleriyle müvâzene olunsa, zararları Devlet-i ʿaliyye zararından efzûn olduğu vâreste-i şübühât u zunûn olup, ʿâkıbet ʿadd-ı nevâciz-i nedâmet ve darb-ı sîne-i hasret ederek, asker-i kalîl ile hâr u zelîl "Hel min sebîl" deyerek, vilâyetlerine ʿazîmet eylediler. İnşâʾallâhü Teʿâlâ kuvve-i istidrâciyyeleri gāyete resîde ve bundan sonra her tarafdan bisât-ı hatt u tirhâlleri berçîde ve ahbâr-ı hezîmet ü inkisârları şenîde olacağı muntazır-ı ashâb-ı hüsn-i ʿakīdedir. İskenderiyye [Ü3 165b] Lîmânı'na munzamm ve cevânibi hasânât-ı menîʿa ile müstahkem kılınan gadîrde, ibtidâ şalope idhâliyle küffâr şalopelerine ilkāy-ı âteş-i kahr u nekâl ve nâmını ser-defter-i abtâl-ı ricâl eden Ahmed Kapudan -ki Paşa hazretlerinin memlûk ve terbiyet-kerdesi ve dâyire-i şecâʿat ü besâletinin perverdesidir- bu defʿa zuhûr eden hidmet-i celâdeti mukābelesinde iltifât-ı Şâhâne'ye sezâ görülüp, bu feth-i celîl haberiyle Âsitâne-i saʿâdet'e irsâl ve hakkında istinzâl-i emtâr-ı minhat-ı Şehriyâr-ı deryâ-nevâl olunmuşidi. Kapudân-ı mezbûr şeref-i muhâtabât ile manzûr ve fâyizi senevî beş kîse bir sehm ile nâyil-i etemm-i sürûr olduğundan başka, çeleng ve ferve-i semmûr ile dil-şâd ve ʿismetlü Mehd-i ʿulyâ hazretleri tarafından dokuz kîse fâyizi olup, kasr-ı yedden ahz olunan Dâru'l-vekâle-i Haleb mukātaʿasıyla ber-murâd kılındı. Bundan başka İngiltere askeri Sergerdesi Hacinson'un birâderi Hacinson nâm Ofiçyâl'in vukūʿ [Ü4 90b] bulan muhârebâtda hidmeti mesbûk ve niʿam-ı nâ-mütenâhiyye-i Pâdişâhâne'den ol dahi mütenaʿʿim u merzûk olmak kasdıyla Kapudân-ı merkūma terfîk olunduğuna binâʾen, mersûmun hakkında dahi bahr-i bî-kenâr-ı kerem ü ʿinâyet-i Şâhâne mevc-rîz-i zuhûr olup, gerden-i iftihârına taʿlîk içün dâyiresi elmâs ile muhât ve merkez-i dâyirede şekl-i mâh nakş olunmuş bir kıtʿa âvîze-i girân-behâ ve taraf-ı hümâyûndan yirmi beş bin ve ʿismetlü Vâlide Sultân hazretleri tarafından on iki bin beş yüz guruşluk altûn ihsân u iʿtâ olundu.