Kapudân-ı deryâ Vezîr Hüseyin Paşa hazretlerinin Mısır'a teveccühlerinde maʿiyyetlerine me'mûr asâkirin tertîbât-ı bahriyyeleri sefâyine teşhîn olunup, bu sebeble mahsûs Nüzül Emîni taʿyîn olunmamışidi. Ancak Reşîd'de vâkiʿ mukaddimât-ı feth u zafer, sevâhilde mütemekkin vahdet-güzînân-ı İslâm'ın sâmiʿalarına güzer etdiğinden, fevc fevc müşârun ileyhin mevkib-i Vezîrâne'lerine şitâb ve giderek vâfir asâkir hâzır olmağla, idâre-i akvât-ı yevmiyyeleri mûcib-i iztırâb olup, idâre-i taʿyînâtları müstakıllen müteʿayyin bir Nüzül Emîni taʿyînini îcâb eylediğine binâʾen, Rodos cânibinde ikāmet ve zahîre tertîbine mübâşeret eden Çavuş-başı Mustafa Beyefendi, me'mûr olduğu hidemât-ı Devlet-i ʿaliyye'de cân-sipâr ve hadd-i zâtında kâr-güzâr ve müstakîmü'l-etvâr olmağla, maʿiyyet-i müşârun ileyhe varup, lâzım gelan umûr-ı taʿyînâtı idare, hasran karâr-gîr-i erbâb-ı istişare olmağla, fi'l-hâl meʾmûriyyet emri tarafına irsâl olunup, bu sûretde Rodos'da olan hıdmeti hâlî ve o maslahatı idâre içün bir merd-i tüvân-gerîn taʿyîni havâlî-kerd-i re'y-i ʿâlî olup, sâbıkı gibi Rodos'da ârâm ve pey-der-pey zahîre îsâline ihtimâm etmek üzere sâbıkā Gümrük Emîni Halîl Efendi me'mûr ve Saferü'l-hayrın yirmi ikinci Sebt günü ʿâzim-i savb-ı mezkûr oldu.