Eşref-i emâkin ü bıkāʿ ve ebrek-i erâzî vü askāʿ olan Haremeyn-i muhteremeyn'e kemâl-i istizlâl ü sükûnet ile hürmet ve fecc-i ʿamîk ve beled-i sahîkden kasd, ziyâret ü mücâveret eden kātibe-i ehl-i İslâm'ın rahatlarına ve bâ-husûs sükkân u kuttânın âsâyiş ü emniyyeti ile idrârât u vezâyiflerinin hulûl-i vaktinde edâ vü istîfâsına ve ol bukʿateyn-i mübareketeynden rics ü âsâmın ref ü izâlesine ikdâm u himmet vâcibe-i zimmet-i diyânet ve ferîza-i ʿuhde-i Saltanat olup, bir müddetden berü Medîne-i münevvere lâ-zâlet bi-envâri'l-İlâhiyyeti müsevverehû muhafızdan hâlî ve Bender-i Cidde mahrûm-ı rûy-i Vâlî olup, Şeyhu'l-Harem bulunan Elmâs Ağa'nın dahi îkāʿ-ı tehdîde kudreti olmayup, ol harem-i İrem-mânend cevânibinde baʿzı nâdân-ı hürmet ve mürtekib-i kebâyir-i hatî'at olanlar şerbet- hâneler ihdâsına cür’et ve müsellah geşt ü güzâr ile ızrâr-ı ʿibâdullâha cesâret eylediklerinden gayri, Mekke-i mükerreme Şerîfi hubb-i dünyâ ve tamaʿ-ı müfrit hasebiyle Cidde'nin kâffe-i mahsûlâtına müteʿarrız olup, vazʿ-ı kadîmi olan münâsafeye ʿadem-i kanâʿat ve erbâb-ı vezâyifin ihrâcât u idrârâtlarını edâda teʿallül ü mümâtale ile cümlesini mübtelây-ı zarûret eylediği sübût-yâfte-i tehakkuk olup, kârına revâc ve derd-i hırsına ʿilâc kasdıyla zabt u rabt-ı ehl-i füsûkdan iʿrâz ve o makūle muharremâtın menʿinden tecâhül ü iğmâz edüp, fi'l-hâl Şeyhu'l-Harem bulunan Elmâs Ağa ʿazl ve Şeyhu'l-Haremlik, Hazînedâr-ı Harem-i [Ü3 146a] hazret-i Nebevî bulunan ʿAbdullah Ağa'ya tevcîh olunup, bu mefâsidin bi'l-külliyye refʿi ve Şerîf-i Mekke'nin gayr ez-muʿayyen Cidde'ye tesallutunun defʿiyle o erâzî-yi mukaddeseden [Ü4 72a] menâhî vü melâhînin izâlesi kaviyyü'l-iktidâr bir Vezîr-i nâmdâra mütevaffık olup, seferler takrîbi ile bu ʿukdenin inhilâline ve bu mefâsidin zevâline muktedir bir Vezîr-nâdir ve mevcûdlar dahi birer şugl ü ʿamel ile meşgûl ü mü'temir olup, Bağdâd Vâlîsi'nin arz-ı ʿIrâk ve kutr-ı Hicâz'da tantana-i Vezâret'i müstefîz u şâyiʿ ve mâl ve asker cihetleriyle kudret ü mikneti emr-i zâhir ü zâyiʿ olduğuna binâʾen, bu münkerâtın izâlesi ve Şerîf'in defʿ-i tesallutu ʿuhdesine ihâle olunmak savâb-nümây-ı erbâb-ı ʿukūl ü nühâ olmağla, dâʾiresinde mevcûd erbâb-ı teʿayyünden Vezâret'e lâyık bir kimseye Vezâret ile Cidde tevcîh olunup, bu emr-i mühimme taʿyîn olunmak ve Haremeyn-i şerîfeyn'den o makūle menhiyyât u muharremâtı defʿ ile nizâm-ı beldeteyn-i mükerremeteyne ikdâm etmek ve Mekke-i mükerreme Şerîfi vazʿ-ı kadîm üzere Cidde gümrüğünden hâsıl olan mâlın nısfına kanâʿat edüp, vülât u hükkâma dâʾir umûr-ı ahvâle taʿarruz etmemek, hâsılı nizâm-ı arz-ı Hicâz ol Vezîr-i mümtâzdan bi-eyyi-vechin kân matlûb-ı Pâdişâh-ı bende-nüvâz olup, bu bâbda nükāve-i reʾy-i rezîni ne ise bir ân akdem tahrîr etmek üzere taraf-ı hazret-i Kāyim-makāmî'den müşârun ileyh tarafına mahsûs kāʾime tastîr u tesyîr olundu.