Talebe-i ʿulûmdan mülâzametleri yedi seneye müntehî olanlar bir zemândan berü [Ü3 140a] ümmîdvâr-ı imtihân oldukları cenâb-ı Fetvâ-penâhî'ye ʿiyân olmağla, işbu Muharremü'l-harâm evâyilinde husûs-ı mezkûr istîzân ve ruhsat-ı seniyye nümâyân olduğu ân talebeye keyfiyyet iʿlân olunup, müşârun ileyh hazretleri icrây-ı hakkāniyyet içün bi'n-nefs derse hâzır oldukları hâlde zümre-i talebe dâru'l-imtihâna idhâl olunup, Mutavvel'den "Ve 'lev' li'l-şarti fi'l-mâzî ma'a'l-kat'i bi-intifâ'i'ş-şart" ibâresi medâr-ı bahs olduğu sâmiʿlarına ilkā ve vâhiden-baʿde-vâhidin o mahfil-i hatîrde ikrâ ve tertîb-i mümeyyizîn olan es'ile-i isnâ ʿaşeranın ekall ü ekserine ve nâdiren cümlesine cevâb-dâde olanlardan yirmi yedi nefer tâlib ve ʿulemâ-zâdelerin on dört kadar hâhiş-ker, merâtib-i medrese ru'ûsuyla nâyil-i eʿazz-i metâlib olup, kemâ hüve'l-vâcib cümlesi duʿây-ı bekāy-ı ʿömr ü devlet-i Şehinşâhî'ye müvâzıb oldular.