Zikr olunan fırka-i bâğıye Edirne Bostancı-başısı ve Tokadcıklı-oğlu Süleymân Ağa taraflarından Paşayedli Karyesi'nde mahsûr ve nefâd-ı meʾâkil ü meşârib ile mahall-i âhara ʿazîmet ü firâra mecbûr olmuşlar idi. İşbu Muharremü'l-harâmın üçüncü günü [Ü3 138a] ʿale'l-gafle karye-i mezkûreden kemâl-i ye's ü hirmân ile hurûc ve berü taraf cemʿiyyetine kelb-i ʿakūr gibi vülûc etmeleriyle, miyânede üç-dört sâʿat kadar nâyire-i harb muztarım ve iki cânibden beş yüz kadar âdem münʿadim olup, eşkıyây-ı mezbûre bu takrîb fürce-yâb-ı firâr ve Edirne Kazâsı'ndu vâkiʿ Kavaklı-kozlıca'da tehassun ü istikrâr etmeleriyle, fi'l-hâl taʿkīb ve sû-be-sû muhâsara vü tenkîb olunduklarından gayri, Tokadcıklı'nın akribâsından beş on nefer kimse [Ü4 64b] bu maʿrekede telef olduğu harâret-i gayzını teşvîr ve ber-vech-i sühûlet isticlâblarına mukayyed olduğu eşhâsın bi'l-külliyye iʿdâm u izâlelerine kalben ve kāliben sâk-ı ihtimâmı teşmîr edüp, ʿalâ-tarîkı'l-istinfâr müceddeden cemʿ-i leşker-i cerrâr edüp, bakıyyetü's-süyûfu kemâl-i şiddet ile hasr u tazyîk eylediği cezm ü tahkīk olundu.