Rûsiyye İmperatoru bu esnâda hâlik ve oğlu yerine mâlik olup, bu haberi mutazammın Der-i devlet-medâr'a olan ʿarîzasının takdîmini Âsitâne'de mukīm elçisine havâle eylediğine binâ'en, elçi-yi mesfûr Bâb-ı ʿâlî'ye gelüp, İmperator'un nâmesini ve Baş-vekîl'in mektûbunu Kāyim-makām Paşa hazretlerine resmen teslîm ve Devlet-i ʿaliyye ile münʿakid olan râbıta-i ittifâkın istihkâmına devleti tarafından müceddeden me'mûr olduğunu şifâhen ifâde vü tefhîm edüp, ittifâk tasdîk-nâmesi mübâdelesinde icrâ olunduğu vech üzere elçi-yi mersûma semmûr kürk iksâ ve müzeyyen esb [Ü4 61b] i'tâ olunup, [Ü3 135b] maʿiyyetinde olanlara dahi kākum ve hilaʿ-i sâyire ilbâs olunduğundan gayri, taraf-ı müstecmiʿü'ş-şeref-i Mülûkâne'den elçi-yi mersûma girân-behâ bir kıtʿa elmas yüzük bahş ve bu muʿâmele teceddüd-i devletleri haberine mebnî olmayup, ittifâk mâddesinin istînâf ü te'yîdi içün olduğu Defter-i Teşrîfât'a kayd u nakş olunup, mâh-ı Zilhicce'nin yirmi ikinci Salı günü tertîb olunan Dîvân-ı ʿâlî'de elçi-yi mezbûr hâk-i ʿatebe-i Mülûkâne'ye vazʿ-ı cebîn-i meskenet ve telebbüs-i hilʿat ile mahalline ricʿat eyledi.