Rumeli Vâlîsi Vezîr Gürcü ʿOsmân Paşa zâtında şecîʿ ü mübâriz ise dahi bu defʿa ʿuhdesine tahmîl olunan umûrun te'diyesinde ʿâciz olduğuna binâ'en, ʿazli cây-gîr-i zamîr ve mücerrebü'l-hâl bir Vezîr'in nasbı ile mesâlih-i devletin temşiyeti müstasveb-i erbâb-ı tedbîr olup, mukaddemâ Rumeli kutrunda mişvârı zâhir ve mehâbet ü satveti kulûb-ı hâfika-i eşkıyâda mütekarrar olan Bosna Vâlîsi Vezîr Hakkı el-Hâc Mehmed Paşa'nın Rumeli mansıbı ile kemâ-kân defʿ-i şûriş-i tugāta me'mûriyyeti istihsân olunduğu, maʿrûz-ı hâk-i kadem-i Hâkān-ı zemân kılınup, müsâʿade-i seniyye nümâyân olduğu sâʿat müşârun ileyh tarafına hükm-i Cihân-mutâʿ gönderilüp, olduğu mahalden tecâvüz etmeyerek, Rumeli taraflarına ʿavdeti tahrîr ü işâret olunmuşidi. Keyfiyyete vâkıf ve fi'l-hâl berü cânibe munsarıf olup, Köstendil'e vusûlü haberi istirâk ve işbu Zilkaʿde'nin yirmi beşinci günü Rumeli Eyâleti tevcîhi ile mâh-ı cihân-gerd-i ikbâli işrâk kılınup, selefi Vezîr ʿOsmân Paşa, Selânik Sancağı'yla melhûz ve Vânî [Ü4 58b] Vezîr Mehmed Paşa, Bosna Eyâleti ile mahzûz ve Karahisâr-ı sâhib Sancağı, Vezîr Ağa Hasan Paşa'ya ihsân ve Kırşehri ve Akşehir sancağları ilhâkıyla Vezîr Ahmed Paşa, Bender muhâfazasına revân olmak üzere ısdâr-ı fermân kılındı.