Bundan akdem Eflâk cânibine Pâsbân-oğlu tarafından kasd-ı tahdîş ile imrâr olunan eşkıyây-ı bed-kîşin haberi Der-i devlet-medâr'a münʿakis olduğundan, defʿ-i tesallutlarına dâmen-i himmet teşmîr ve Silistre Vâlîsi Vezîr Mûsâ Paşa'ya dahi kazıyye tahrîr olunmuşidi. Müşârun ileyh o tarafa vâfir asker geçirüp ve o havâlîde ârâm-gîr olan asker-i Pâdişâhî ile bi'l-ittifâk düşmen üzerine sell-i şemşîr etmişler idi. Tâyife-i eşkıyâ mukāvemetden dûr ve ekserîsi niʿmet-i hayâtdan [Ü4 46b] mehcûr olup, cemʿiyyet-gâhları olan Kırayova'yı terk ü firâr ve Kalafat'a karîb “Cevroy” nâm karyeye tehassun ile muntazır-ı vehâmet-kâr oldukları ve fazl-ı Hakk ile karye-i mezkûrede dahi gayr-i müstekarr ve geldikleri mahalle müstenfir olacağlarını Vezîr-i müşârun ileyh ifâde ve bu mazmûnda kāyime firistâde eyledi.