Hakîm-zâde ʿAli Paşa hafîdi Mîr es-Seyyid ʿAli Rızâ Efendi'ye semâhatlü Şeyhulislâm Efendi tarafından misliyye ile ikrâm ve Hâmise iʿtibârının [Ü3 116a] tahkīkı iltizâm olunmuşidi. Mîr-i mûmâ ileyhin Üsküdâr Mevleviyyeti ile ber-murâd olunmasına irâde-i ʿaliyye teʿalluk eylediğine binâʾen, iki yüz on altı senesi Cumâdelûlâ'sı gurresinden zabt u tasarruf etmek şartıyla kazâʾ-i mezkûr şeref-yâfte-i sudûr olan hatt-ı mevâhib-mahsûr mûcebince işbu gurre-i Şaʿbân'da mîr-i mûmâ ileyhe tevcîh ü ihsân ve merreten baʿde-uhrâ eşbâh u akrânına takdîm ile münbasit ü ferhân kılındı.