Müşârun ileyhin bundan akdem cânib-i Mısır'a meʾmûriyyeti ve müretteb-i maʿiyyeti olan ecnâd ile bir ân akdem Âsitâne'ye ve andan sefâyin ile Mısır'a ʿazîmeti güzâriş-pezîr-i zebân-ı beyân olmuşidi. Müşârun ileyh mevcûd-ı maʿiyyeti bulunan asâkir ile bahran Âsitâne'ye vusûl ve bekāyây-ı askerine intizâren kendüsi Kılıç ʿAli Paşa'da vâkiʿ bir sâhil-hânede ve askeri hıyâm ile Haydar-paşa'da ârâm edüp, rikâb günü huzûr-ı hümâyûna duhûl şerefiyle nâyil-i eʿazz-i meʾmûl olup, [Ü3 97a] takbîl-i ʿatebe-i Mülûkâne ile muvakkar ve âbâ vü ecdâdına nasîb olmayan iltifât ü nevâzişe mazhar olmuşidi. Balkānın öte yüzünde olan dağlı eşkıyâsının meʿâbir ü mesâlikleri her tarafdan mesdûd ve esbâb-ı istîsâl ü tedmîrleri bâbında sarf-ı mechûd kılınmışiken, Niğbolu vakʿasından sonra mecmaʿ-ı eşkıyâ olan Plevne'den bir gürûh-ı mekrûh ayrılup, derbendlere uğramaksızın saʿbü's-sülûk mahallerden hufyeten murûr ve Kızanlık semtlerinde zuhûr eyledikleri ihbâr olunup, geçen sene Tekfürdağı ve İne taraflarında cesâret etdikleri şekāvete kemâ-selef tesaddî ve ʿibâdullaha itâle-i dest-i cevr ü teʿaddî eyleyecekleri ihtimâlden gayr-i baʿîd ve Ordu-yi hümâyûn'un el-hâletü hâzihî fazl-ı Hakk ile ʿaskere ʿadem-i ihtiyâcı zâhir ü bedîd olduğuna binâʾen, Vezîr-i müşârun ileyhin Rumeli cânibine insırâfı savâb-dîd-i erbâb-ı bînîş ü dîd olmağla, işbu Cumâdelûlâ'nın yirmi ikinci Sebt günü [Ü4 22b] Bâb-ı âlî'ye ihzâr ve serâsere kablu ferve-i semmûr ilbâsıyla sûret-i me'mûriyyeti işʿâr olunup, ihtiyâten on kıtʿa top ve iki kıtʿa hâven ile bir orta Topçu ve yarım orta ʿArabacı dahi maʿiyyetine terfîk ve kâffe-i levâzımı tanzîm ü tensîk olunup, askerini Davud-paşa Sahrâsı'na imrâr ve kendüsi işbu Cumâdelâhire'nin dördüncü günü Rumeli tarafına müsteʿînen billâh güzâr eyledi.