Müşârun ileyhimânın Mısır vakʿasında zuhûr eden cübn ü tekâsülleri ve baʿdehû me'mûr oldukları mahalle îrâd-ı ʿözr-i bârid ile ʿadem-i ʿazîmetleri te'dîblerini îcâb ü iktizâ eylediğine binâ'en, ber-minvâl-i muharrer tûğ ve sancakları refʿ ve Vezâret kayıdları terkīn ü ilgā olunup, Ordu-yi hümâyûn vüzerây-ı ʿizâmdan [Ü4 13b] hâlî ve kaviyyü'l-iktidâr birkaç Vezîr'in celbi matlûb-ı hazret-i Sadr-ı ʿâlî olduğundan gayri, Ordu-yi hümâyûn'dan istiskāl ve mansıblarına ʿazîmetleriyçün ısdâr-ı misâl olunan Vezîr Hüseyin Paşa ve İsmâʿîl Paşa tebeʿât-ı sâbıkalarını tezekkür ile gâh tekaddüm ve gâh te'ahhur üzere Rûm'a çekilüp gelmek âvâzelerini işâʿa ve tahdîş-i sâmiʿa etmeleriyle, mukābelelerinde ihtiyâtan bir Vezîr-i dilîrin vücûdu lâzım gelüp, mukaddemâ Vezâret'i refʿiyle Divrigi'de mukīm olan Köse Mustafa Paşa sâhib-i şöhret ü miknet olduğuna binâ'en, menşûr-ı Vezâret'i tecdîd ve Eyâlet-i Sivas tevcîhiyle bâzû-yı iktidârı tesdîd olunup, zâhirde iki bin piyâde ve bin nefer süvâriyle Ordu-yi hümâyûn'a [Ü3 89a] ve bâtında müşârun ileyhimânın tavr u hareketlerine nazar ve şuyûʿ bulduğu vech üzere reftâr-ı bâgıyâneleri mukarrer olduğu hâlde güzergâhlarını sedd ve sell-i şemşîr-i edeb ü hadd etmek me'mûriyyeti sırran tarafına işʿâr ve mütebassırâne hareket eylemesi ifâde vü tezkâr olundu.