Ordu-yi hümâyûn'da Yeniçeri Ağası olup, hatî'ât-ı sâbıkasına binâ'en ʿazl ve iki tûğ ile ʿArîş muhâfazasına nakl [Ü4 12a] olunan ʿÖmer Paşa bu esnâda hulûl-i ecel-i mevʿûduyla berzah-ı peymây-ı hülk ü fenâ olduğu haberi Sadrıaʿzam hazretleri tarafından inbâ olunduğuna binâ'en, dem-be-dem ihtilâs-ı fursat ile cemʿ eylediği emvâl, dâhil-i Dâru'l-hızâne-i Pâdişâh-ı cemîlü'l-hısâl oldu. Mûmâ ileyh sefer esnâsında Segbân-başı bulunup, çârsûya isâbet eden ihrâkda bekçi nâmıyla müterassıd-ı fursat-ı gāret olan Ekrâd'ın nehb eyledikleri nukūd-i ehl-i hirfeti iʿmâl-i latâyifü'l-hiyel ile idhâl-i hemyân-ı hıyâneti edüp, esbâb-ı maʿîşetine bi'l-külliyye nizâm ve baʿde'l-ʿazl Üsküdar'da müreffehü'l-hâl [Ü3 87b] ve mutma'innü'l-bâl sübha-şümâr-ı eyyâm ve bu sefer evâyilinde bir takrîb Yeniçeri Ağalığı'nı igtinâm ve fart-ı hırs u tehâlük ile meclûbât-ı bakıyyesin itmâm edüp, “el-Cidetü vesîletü'l-mefsedeti” kazıyye-i müsellemesi mûmâ ileyhi izlâl ve mahsûsâta sevk ile maʿkūlâtdan igfâl edüp, bu esbâb ile mesnedinden dûr ve bâlâda zikr olunduğu vech üzere ʿArîş'de mücâvir-i ehl-i kubûr oldu.