Re'îsü'l-ʿulemâ olan Velî Efendi-zâde Mehmed Emîn Efendi zâhir-i hâlde perhîz-kâr u ʿafîf ve zulm ü gadre rızâsı olmadığı maʿlûm-i vazîʿ ü şerîf olup, bundan akdem sûʾ-i karîn sevkıyla arpalığı olan Tırnova Kazâsı'na niyâbete taʿyîn eylediği “İshâk Efendi” nâm müfsid, mecbûl olduğu hırs u tamaʿ iktizâsıyla meslek-i nifâk u tezvîri ihtiyâr ve gâh devlet ve gâh erbâb-ı gavâyet semtine meyl ü rağbet izhârını celb-i hutâm-ı dünyâya medâr-ı küllî eylediği hasebiyle, Tırnova Kazâsı muhtell ve dağlı eşkıyâsına mesken ü mahall olup, o makūle mefsedet-pîşenin ahvâli mücerreb ü maʿlûm ve vardığı yerlerde şöhreti bâlâter-i şöhret-i Kādî-yi Sedûm iken, hıdmet-i şerîʿatde istihdâmı mahdûmuna [Ü4 3b] renciş ü igbirâr îcâb etmekle, zikr olunan arpalık refʿ ve taraf-ı Fetvâ-penâhî'de ber-vech-i vedîʿa tevkīf ile arpalık ashâbı inzâr u tahvîf ve fîmâ-baʿd o hıdmet-i şerîfede munsif ü muʿtedil nevvâb istihdâm olunmak [Ü3 79b] tenbîhâtıyla bâre-i fukarâdan bâr-ı zulm ü cevr tahfîf olundu.