Bu sâl-i meyâmin-fâlde cânib-i Mısr-ı Kāhire'ye külliyyetlü donanma ihrâcı muktezayât-ı vakt ü hâlden olduğuna binâ'en, birkaç mâhdan berü techîz-i sefâyine himmet ve celb-i askere gayret olunup, ikdâm ü saʿy-i hazret-i Zillullâhî ile levâzım-ı Donanma-yi hümâyûn tekmîl ve işbu Zilhicce'nin ikinci günü harekete ruhsat tahsîl olunmuşidi. Yevm-i mezkûrda Şehriyâr-ı Sürûşî-hısâl, Yalı Köşkü'ne sâye-endâz-ı iclâl ve kudûm-i şeref-lüzûm-ı Şâhâne'lerine çeşm-i be-râh-ı intizâr olan Şeyhulislâm ve Kāyim-makām Paşa hazerâtını tevcîh-i nîm-nigâh-ı iltifât ile rehîn-i istibşâr buyurdukları hılâlde, Kapudan Paşa hazretleri dahi âyib ve takbîl-i ʿatebe-i Mülûkâne ile nâyil-i eʿazz-i me'ârib olup, lisân-ı güher-feşân-ı Cihân-bânî'den şeref-sudûr [Ü3 69b] olan tenbîhât u vesâyâya havâle-i semʿ-i icâbet ve muʿtâd üzere müşârun ileyhimâ hazerâtıyla kürkünü geyüp, sâyirlerin hilʿatleri tekmîlinde Donanma-yi hümâyûn'a ʿavdet eyledi.