Rumeli Vâlîsi Vezîr Hasan Paşa'nın mülâyemet ü rehâveti erbâb-ı fesâdın mûcib-i rûʿûnet ü habâseti olmak hasebiyle, zuʿafây-ı nâs pençe-i şikence ile remîde ve ʿazli derece-i vücûba resîde olup, mişvârı maʿlûm bir Vezîr'in Rumeli Vâlîsi nasb olunması beyyinü'l-lüzûm olmağla, Selânik Mutasarrıfı Vezîr ʿOsmân Paşa behâdır ve me'mûr olduğu ʿazâyim-i umûrda ikdâm ü şecâʿati “Ke'ş-şemsi fi'l-hevâcir” zâhir olup, binâ-berîn Sofya'da [Ü1 271b] ikāmet ve etrâfa havâle-i çeşm-i basîret ve defʿ-i mazarrat-ı erbâb-ı mekîdet etmek üzere Rumeli Eyâleti, müşârun ileyhe tevcîh ve Selânik Sancağı, selefine verilüp, Edirne'de li-ecli'l-muhâfaza ikāmeti tenbîh olundu.