Sadrıaʿzam ve Serdâr-ı ekrem [Ü1 258b] hazretleri zîr-i livây-ı nusrat-iltivâsında tehaşşüd eden asâkir-i İslâm ile Gazze Sahrâsı'nı madrab-ı hıyâm eyleyüp, ʿavn-i Melik-i kadîr ile ʿArîş Kalʿası'nı âverde-i kemend-i teshîr eylemek niyyetini cây-gîr-i zamîr eylediğine binâʾen, katʿ-ı imdâd-ı aʿdâ mekāsıdıyla ibtidây-ı emrde Sâlihiyye'den tarafa ʿArîş Kalʿası'na bir buçuk sâʿat mesâfe olan Bi'r-i Mesʿûdiyye'nin zabtını takdîm ve Ordu-yi hümâyûn'da mevcûd vüzerây-ı ʿizâmdan Nasûh Paşa ve Mustafa Paşa'yı ve Elfî Mehmed Bey ile Cerrâr-oğlu'nu [Ü3 54b] ve ümerây-ı Mısrıyye'yi bu maslahata taʿyîn ve mâ-lezimelerin tetmîm buyurmuşlar idi. Mahall-i mezkûrun zabt olunduğu haberiyle âzân-ı ehl-i îmân müşennef ve imdâd-ı muhâbere-i aʿdâ gāyilesi ber-taraf oldukdan sonra, Sivas Vâlîsi Vezîr Receb Paşa, Başbûğ nasb olunup, maʿiyyetine tertîb-i ceyş-i mevfûr ve ʿArîş Kalʿası'nı dest-i aʿdâdan istihlâsa meʾmûr kılındığından gayri, Bi'r-i Mesʿûdiyye'de mukîm Vezîr Mustafa Paşa'nın dahi bu cemʿiyyete idhâli münâsib görülüp, fi'l-hâl meʾmûriyyet emri berîd-i istiʿcâl ile tarafına irsâl olunmuşidi. Asâkir-i zafer-encâm ʿArîş mukābiline rekz-i aʿlâm eylediklerinde, Başbûğ olan Vezîr Receb Paşa tenbîh-i Serdâr-ı ekremî üzere kalʿada mütehassın olan aʿdâya iblâğ-ı peyâm ve bilâ-muhârebetin kalʿa teslîm olunduğu hâlde diledikleri mahallere insırâfları tecvîz olunup, muhârebeye tesaddî ederler ise, istimânları mukārin-i lihâza-i rağbet olmayup, cümlesi tuʿme-i dehen-i hüsâm olacağları ifhâm olundukda, hasânet-i kalʿaya igtirâr ile kuvvet ü miknetlerin ifâde ve envâʿ-ı lâf ü güzâf ile mebʿûsları iʿâde eylediklerinde, hizebrân-ı bîşe-i celâdet mahall-be-mahall hasr-ı kalʿaya bezl-i cehd ü tâkat ve keyfiyyeti taraf-ı Serdâr-ı ekremî'ye [Ü1 259a] tahrîr u işâret eylediklerinde, Sadr-ı müşârun ileyh hazretleri Ordu-yi hümâyûn'u Gazze Sahrâsı'nda ibkā ve sebükbârca ʿArîş'e doğru tahrîk-i bâd-pâ eyleyüp, akreb-i evânda ʿArîş'e vusûl ve bir buçuk sâʿat mesâfede vâkiʿ bir mahalle nüzûl ile gayret-keşân-ı [Ü3 55a] İslâm'ı tahrîz u iğrâ ve top ve humbara ve sâyir âlât-ı nâriyye ile düşmen-i mahsûru sûzân-ı âteş-i heleket ü fenâ eyledikleri hâlde aʿdây-ı liʾâm kalʿadan hurûc ile muhârebeye kıyâm ve berü tarafdan mukābele-i merdâne ile sell-i seyf-i hısâm kılınup, sevret-i İslâmiyye'ye tâb- âver olamadıklarından, istîmân sûretlerini izhâr etmeleriyle “eş-Şartu emleku" mefhûmu üzere emânları dâhil-i dehlîz-i semʿ-i iʿtibâr olmayup, sergerdeleriyle yüz elli nefer kefere-i bed-ahter merbût-ı hibâle-i isâr ve bâkīsi müste'sal-i seyf-i hûn-bâr kılınup, üserâyı Vezîr Mustafa Paşa huzûr-ı Serdâr-ı ekremî'ye getürüp, ferve-i semmûr ve çelenk-i müstevcibü'l-hubûr ile bedr-i kadri ilmâʿ ve zevâyây-ı kalʿada ser-nühüfte-i genc-i ihtifâ olan aʿdâ'ı ahz ve cebe-hâne ve mühimmâtı zabt içün müşârun ileyh ircâʿ olunup, bi-hasebi'l-me'mûriyye kalʿaya gelüp, burûc-ı kalʿadan birine suʿûd ve tabl u sûrnâsını darb ile izhâr-ı şâd-mânî vü sürûd eylediği hâlde tahte'l-burc müddahar olan barut âteş alup, müşârun ileyh ile dâyiresi halkının mevcûdları müştaʿil ve derece-i şehâdete neyl ile civâr-ı rahmet-i Hakk'a müntakıl oldukları ve dest-i aʿdâya giriftâr oldukdan sonra, hasânât ve burûc-ı müşeyyede ile istihkâm verilmiş olan işbu kalʿa-i menîʿa fazl-ı Hakk ile tekrâr zamîme-i mülk-i Pâdişâhî olduğu haberi evâhır-ı Şaʿbân'da (21-29 Şaʿbân 1214 = 18-26 Ocak 1800) tanîn-endâz-ı sâmiʿa-i mü'minîn ve mûcib-i inşirâh-ı sudûr-ı Muvahhidîn oldu. Serdâr-ı ekrem hazretleri [Ü3 55b] tarafından cilve-ger-i meclây-ı [Ü1 259b] zuhûr olan saʿy ü ikdâm-ı nâ-mahsûr nezd-i ferd-i Mülûkâne'de meşkûr olduğuna binâ'en, müşârun ileyh hazretlerine ʿatıyye-i hümâyûn olarak yetmiş beş bin guruşluk zer-i nâb ve serâpâ cevher-i kem-yâb ile ârâste bir kıtʿa çelenk-i âfitâb-tâb ʿinâyet olunduğundan fazla, maʿiyyetinde olan vüzerâ-yı ʿizâmın ru'ûs-i mübâhâtları tezyîn olunmak içün üç kıtʿa mücevher ve sâyir müteʿayyinân-ı Ordu-yı hümâyûn'a on kıtʿa sâde altûn çelenk irsâl ve bu haber-i beşâret-iştimâl ile vürûd ve maʿreke-i mezkûrede isbât-ı vücûd eden Sadrıaʿzam hazretlerinin Kapucular Kethudâsı ʿOsmân Bey, huzûr-ı müstelzimü's-sürûr-ı Şâhâne'ye duhûl ile ruhsat-yâb-ı kıyâm u müsûl olup, vukūʿ buluan fütûhâtı vukūʿu üzere takrîr, sebeb-i inkişâf-ı tabʿ-ı Pâdişâh-ı kişver-gîr olup, mûmâ ileyhe dahi beş bin guruş ʿatıyye-i behiyye ile bir sehm inʿâm ve Mehd-i ʿulyâ dâmet ʿismetuhâ hazretleri tarafından dahi iki bin beş yüz guruş ve Dâru's-saʿâde Ağası hazretleri tarafından bir ferve-i semmûr ile bin beş yüz guruş ikrâm olunduğundan gayri, silahşörân-ı Hâssa-i Şehriyârî zümresine idhâl ve Bâb-ı âlî'den dahi semmûr kürk ve çelenk ile sunûf-ı iltifât ikmâl olundu.