Bir mâh mukaddem [Ü1 245b] Bosna Eyâleti [Ü3 39b] tevcîh olunan Zihneli Hasan Paşa mansıbına ʿazîmet ile Yeni-bâzâr'a vürûdunda penbe-zâr-ı pîrâhen-i hayâtı çâk-çâk-i şîr-pençe-i ecel-i müsemmâ ve kişt-zâr-ı ʿömr-i nâ-pâydârı direvîde-i mincel-i hükm-i kazâ olup, münhall olan mansıbı, mutasarrıf-ı sâbıkı Vezîr Vânî Mehmed Paşa'ya tevcîh ü takrîr ve Rumeli Eyâleti'yle Silistre Vâlîsi Vezîr Hasan Paşa'nın aʿyün-i ibtihâcı takrîr olunup, Silistre Eyâleti, mukaddemâ Cerde Başbuğu olup, refʿ-i Vezâret'iyle Yenişehir'de ikâmeti fermân olunan Mûsâ Paşa'ya tevcîh ü ihsân olundu. Dağlı eşkıyâsına me'mûriyyetle Edirne'de mukîm Vezîr Yûsuf Paşa ile Edirne Bostancı-başısı beyninde ihtilâf-ı kelime vâkiʿ olmakdan nâşî, ahadühümâ âharı istiskāl ve maslahat-ı devleti berhem-zede-i ihtilâl etmeleriyle, Yûsuf Paşa Edirne'den nehzat ve bir mahall-i ba'îde 'azîmet eylediği hâlde münferiden dağlı eşkıyâsının istîsâline Bostancı-başı müteahhid ve tasavvurât-ı zihniyyesini baʿzı delâyil ile musaddık u mü’ekkid olup, müşârun ileyhe mansıbı olan Tırhala Sancağı ilhâkıyla Hotin muhâfazası tefvîz ve Hakkı Paşa'nın mansıbı olan Hanya, Kandiye ile taʿvîz olunup, selefi Vezîr Mehmed Paşa, Eğriboz Sancağı'na ihrâc ve Mîr-i mîrân'dan Tâhir Paşa, Hanya mansıbına idrâc olunup, kapu-kethudâları işbu Rebîʿulevvel'in on dördüncü Sebt günü hilaʿ-i zâhire telebbüsüyle ser-germ-i rahîk-ı ibtihâc oldular. Edirne Bostancı-başısı'nın defʿ-i eşkıyâda olan ikdâm ü gayreti ve refte refte ru'ûs-i eşkıyâ [Ü3 40a] irsâliyle ibrâz-ı merdânegî vü hamiyyeti bâʿis-i revâc-ı maslahatı olup, dil-bend-i ümmîd olduğu Çirmen Sancağı ilhâkıyla kadri bülend kılındı.