Vidin müteʿayyinlerinden Pâsbân-oğlu ʿOsmân Ağa bundan akdem hılâf-ı rızâ harekete ictirâ eylediğine binâʾen, üzerine asker taʿyîn ve hasr u tazyîk ile şiddet-i şekîmesi telyîn olunup, [Ü1 233a] fîmâ-baʿd Devlet-i ʿaliyye'ye itâʿat ve cerâyim-i sâbıkasından rucûʿ u inâbet eylediğini mutazammın ʿarîzaları müteʿâkıbü'l-vürûd ve Vidin ehâlîsi dahi dest-i niyâz ü şefâʿati memdûd eylediklerinden, mazhar-ı ʿafv-ı Şehriyâr-ı merhamet-nümûd olmuşidi. [Ü3 24a] Bir müddetden sonra igvâ ve tesvîl-i ehl-i tadlîl ile kemâ-kân gerden-keş-i tavk u inkıyâd ve etrâf u eknâfa itâle-i dest-i fesâd eylediği hadd-i tevâtüre resîde olmağla, vücûb-ı te'dîb ü gûşmâli karâr-gîr ve üzerine asker-i kesîr ile bir Vezîr-i dilîr taʿyîni müstasveb-i müşîr ü müsteşîr olup, bâlâda beyân olunduğu vechile hâlâ Deryâ Kapudanı Vezîr Hüseyin Paşa, maʿiyyetine ol havâlîde bulunan vüzerây-ı ʿizâm ve Mîr-i mîrân-ı kirâm ilhâk u terfîk ve hâric-i kalʿada bulunan ʿusâtın şeml-i cemʿiyyetleri tefrîk ve Vidin Kalʿası dâyiren mâ-dâr ihâta vü tazyîk olunup, müşârun ileyh dahi mecbûl olduğu merdânegî vü sebât ve ʿatâyâ vü inʿâmâtda kusûr etmeyüp, husûl-i matlab zımnında terk-i râhat u hâb ve iğrâ vü tahrîz-i askerde bezl-i cehd ü tâb edüp, müddet-i muhâsara vü müşâcere birkaç mâh güzer ve kalʿaya zafer mukarrer olduğunu husamâ tahkīk ile tekrâr teşebbüs-i zeyl-i merhamete muztarr olduklarından, dâd-hâhları âyib ü zâhib ve ıslâh-ı zâtü'l-beyn hâletleri mütekārib olup, bu vesîle ile ictimâʿ eden asker dahi ʿavdete müteheyyiʾ ü müteʾehhib olmuşlaridi. Bâʿzı hâyin-i zi'l-vecheyn temâdî-yi eyyâm-ı esfârdan hâsıl olan fâyideden temettuʿ kasdıyla ifsâd-ı mâ-beyne'l-cânibeyn ve selb-i iʿtimâd-ı tarafeyn edüp, ʿavdete tavtîn-i nefs eden asâkir dahi o esnâda ricʿat ve Serʿasker Paşa dahi salâh-ı kârdan me'yûs ve berhem-zen-i dest-i efsûs olarak Rahova cânibine ʿazîmet edüp, birkaç sene mukaddem vücûb-ı izâlesi müsellem olan [Ü1 233b] Rumeli Valîsi ʿAli Paşa'yı iʿdâm ve baʿdehû Ruscuğ'a tahrîk-i aʿlâm edüp, o hılâlde yine merkūm niyâz-ı ʿafv ile ʿarz-ı hâller tesyîr ve kendüye Vezâret [Ü3 24b] ihsân olunduğu hâlde Devlet-i ʿaliyye'ye bi's-sıdkı ve'l-istikāme hidmet eyleyeceğini tahrîr edüp, Françelü'nün Memâlik-i mahrûse'ye sû'-i kasdı ve Devlet-i ʿaliyye'nin berr ü bahrda küllî iştigāli vaktinde bu husûs içün itʿâb-ı asker ve kazıyyede medhali olmayup, mağlûb u menkûb olan serhad-nişîn zuʿafâsını pâ-zede-i hasâr u zarar eylemek revâ görülmeyüp, rahmen li'l-ʿibâd niyâzına müsāʿade olunmasını Sadrıaʿzam hazretleri bi'n-nefs taraf-ı müstecmiʿü'ş-şeref-i hazret-i Hılâfet-penâhî'den iltimâs ve nâyil-i Vezâret oldukdan sonra, nefsini islâh ve bâgıyâne reftârını istikbâh ile sâlik-i menhec-i inkıyâd u felâh olmadığı hâlde devlet-i kāhire-i Pâdişâhî'de tedârükü görülmek ve esbâb-ı istîsâli istihsâl olunmak şartını mukaddime ve esâs eylediğine binâ'en, Vezâret'e istiʿdâd gelmek içün ibtidâ Kapucu-başılık tevcîh ü ʿinâyet ve me'mûrlara taʿmîm-i ruhsat ile Kapudan Paşa hazretleri dahi Ruscuk'dan fekk-i tınâb-ı ikāmet ve Âsitâne-i saʿâdet'e tahrîk-i mihmîz-i ricʿat etmişidi. Mûmâ ileyh hakkında sebkat eden vaʿd-i devlet karîn-i incâz kılınup, işbu Muharrem gāyetinde Vidin Muhâfızlığı inzımâmıyla silk-i vüzerâya idhâl ve Kapucu-başı Cihân-zâde Hüseyin Bey ile tarafına menşûr ve hilʿat-i Vezâret irsâl olundu.