ʿAvn ü ʿinâyet-i Bârî ve yümn-i ikbâl-i hazret-i Tâc-dâri'yle edevât-ı harbiyye tahsîl ve esbâb-ı seferiyye tekmîl olunup, fîmâ-baʿd Serdâr-ı ekrem hazretlerinin aʿdây-ı dîn üzerine sevk-ı sipâh-ı Muvahhidîn eyleyerek hareket ü ʿazîmetleri matlûb-ı Şehriyâr-ı zafer-karîn olmağla, işbu Zilhiccetü'ş-şerîfenin on beşinci İsneyn günü Teşrîfât Defteri nâtık olduğu vech üzere erbâb-ı alay, [Ü3 17a] seherî kudûm-i Âsafî'ye intizâr ile Üsküdar'a ve Kapudan Paşa ve Kāyim-makām Paşa ve Şeyhulislâm Efendi hazerâtı maslahat-ı mürâfakat içün Bâb-ı ʿâlî'de bulunmaları irâde buyurulup, yevm-i mezkûr Şehriyâr-ı gayret-şiʿâr dâme fî ʿavni'l-Meliki's-Settâr hazretleri Alay Köşkü'nü zât-ı bî-hemtâlarıyla revnak-şiken-i Kasr-ı Havernak buyurdukları haberi Bâb-ı ʿâlî'ye vürûd ve mûmâ ileyhim hazerâtı fi'l-hâl fekk-i tınâb-ı kuʿûd ve huzûr-ı hümâyûna vusûl ile kesb-i şeref-i nâ-mahdûd eylediler. Umûr-ı seferiyyeye [Ü1 227b] dâ'ir dürc-i le'âlî-yi hikmet olan dehân-ı hazret-i Gîtî-sitânî'den sâdır olan mervârîd-i vesâyây-ı seniyyeyi Serdâr-ı erkem hazretleri mengûş-ı gûş-i izʿân eyledikden sonra, kāmet-i Âsafî'leri semmûr-i câlibü'l-hubûr ile zînet-yâb-ı itfihâr ve miyân-bend-i gayretleri tîr-keş-i cevher-dâr taʿlîkına sezâvâr görülüp, Müfti'l-enâm hazretleri dahi telebbüs-i ferve-i beyzâ ʿakabinde resm-i bisât-bûsî-yi vedâ icrâsıyla maʿan Üsküdar'a mıkzâf-cünbân-ı ʿazîmet ve mukaddemce ihzâr olununan âlây-ı dilârâ ile Otağ-ı süreyyâ-nitâk'a kadem-nihâde-i meymenet oldular. Erbâb-ı alay takbîl-i zeyl-i Sadr-ı ʿâlî-cenâb ile şeref-yâb oldukdan sonra, seferber olanlar orduda ikāmet ve olmayanlar Âsitâne'ye ʿavdet ve me'mûr oldukları hıdemâtın te'diyesine mübâderet eylediler.