Sadrıaʿzam hazretleri sefere meʾmûr olmakdan nâşî, vüzerây-ı ʿizâm hazerâtından biri Kā'im-makām nasb ü taʿyîn ve hutûb-ı devlet kemâ-yenbagī ru'yet olunmak de'b-i dîrîn olup, binâʾen-ʿalâ-zâlik hâlâ Selânik Mutasarrıfı Vezîr Ebûbekir Paşa hazretleri Devlet-i ʿaliyye'de zabt-ı menâsıb ve ihrâz-ı merâtib eyleyerek, irsen ve istihkākan nihâyet-i derece-i beşeriyye olan Rütbe-i celîle-i Vezâret'le mükerrem olup, matlaʿ-ı Vezâret'lerinden ilâ-yevminâ hâzâ tasarruf u tevellâ eyledikleri eyâlât ve elviyede hüsn-i sülûk ü sîretleri ve himâye-i zuʿafâ ve zîr-i destân ile şöhretleri “Ke'ş-şemsi fî ʿanâni's-semâ” zâhir ü hüveydâ olduğundan gayri, zât-ı fezâyil-simâtları menbaʿ-ı cûy-bâr-ı ʿulûm ve maʿden-i cevâhir-i mantûk u mefhûm olup, havâss-ı nâsa ârâyiş ü zînet olan şiʿr u inşâda yegâne ve meʿârif-mendân-ı rüzgâra [Ü3 16b] zerrîn-süvâr-ı sâʿid-i mefharet olan cevdet-i hatt ve insicâm-ı kelâmda müfred-i zemâne olup, tedbîr-i umûr-ı mülk ü milletde Aristo'ya müdânî ve temşiyet-i mesâlih-i devletde Âsaf-ı sânî oldukları bi'l-istidlâl maʿlûm-i hazret-i Şehriyâr-ı deryâ-nevâl olduğundan fazla, bu esnâda mahrûse-i Selânik'de ser-i ber-âverde-i bagy ü şikāk olan eclâf u erâzilin baʿzısını kuvvet-i şehâmet ile ser-dâde-i vâdî-yi [Ü1 227a] inʿidâm ve baʿzısını nîrû-yı fütüvvet ile reh-peymây-ı semt-i inhizâm edüp, memleket-i Pâdişâhî'yi te'mîn ve nâ'ire-i fitne vü âşûbu ıtfâ vü teskîn eylediği, mir'ât-ı hakāyık-ı eşyâ olan tabʿ-ı münîr-i hazret-i Tâc-dârî'de sûret-nümâ olmağla, hakk-ı Vezîrâne'lerinde muzmer olan hüsn-i zann-ı Şâhâne mütezâyid ü efzûn ve inâle-i devlet kurb ü ittisâl-i güzâriş-pezîr-i zamîr-i Pâdişâh-ı rubʿ-meskûn olduğuna binâʾen, işbu Zilkaʿde'nin on altıncı günü karîha-i sabîha-i Mülûkâne'den Kā'im-makāmlık câh-ı refîʿiyle bâlâ-rev-i ser-menzil-i ikbâl ve taraf-ı bâhirü'ş-şeref-i hazret-i Sadâret-penâhî'den daʿveti mutazammın tahrîrât ile Selâm Ağası ol savb-ı saʿâdet-evbe matiyye-rân-ı istiʿcâl olmuşidi. Mâh-ı Zilhiccetü'ş-şerîfenin onuncu yevm-i ʿîd Âsitâne-i saʿâdet'e vusûl ve şimdilik Kapu Kethudâları olan Mükellef-zâde Mustafa Bey hânesine nüzûl eyledi.