Zilkaʿdetü'ş-şerîfenin sekizinci günü sâha-i Bâb-ı ʿâlî'de rekz olunan tûğ-ı zafer-fürûg-ı Âsafî'nin bi'l-fevzi ve's-saʿâdeti tahrîki zemânı gelmekle, tertîb olunduğu üzere vakt-i muhtârdan evvel Yeniçeri ve Cebeci ocağlarının tûğları ve konakcıları ʿale's-seher Bâb-ı Âsafî'ye vürûd ve hulûl-i vakte intizâren kuʿûd etmişler idi. Zemân-ı hareket tekarrüb ve fi'l-hâl tûğ-keşân te'ehhüb edüp, Kethudây-ı Sadr-ı vakūr telebbüs-i ferve-i semmûr etdikden sonra, esbine süvâr ve ocağların tûğlarına kafâdâr olarak tabl u sûrnâ vâlâ-yı dilârâ ile muhayyem-i asker-i İslâm olan Haydar-paşa fezâsına vusûl bulduklarında, mukaddem ihzâr olunan e'imme ve mü'ezzinîn kırâ'at-i Feth ile velvele-endâz-ı semâvât u arazîn oldukları hâlde zebh-i karâbîn ve iğnây-ı mesâkîn kılınup, ocağların tûğları dahi mahallerine nasb olunmak içün ruhsat verilüp, ber-mûceb-i teşrîfât ilbâsı muʿtâd olanlara hilʿat ilbâsından sonra ʿavdet eylediler. Zilkaʿde'nin on ikinci Pençşenbih günü Dergâh-ı âlî ocağlarından tertîb olunan odalar Alay Köşkü altından murûr ve ru'esâları hilaʿ-ı Pâdişâhî ve baʿzı 'atâyây-ı Şehinşâhî ile kesb-i iftihâr u sürûr edüp, Yeniçeri Ağası dahi, [Mısra]: "ʿAdet budur âhırda gelür bezme ekâbir" mü'eddâsınca cümleye kafâdâr olarak Alay Köşkü altına gelüp, Çavuş-başı Ağa ve Kapucular Kethudâsı Ağa [Ü3 16a] vesâtatiyle huzûr-ı hümâyûna idhâl olunup, baʿzı vesâyâ vü tenbîhât ʿakabinde semmûr kürk ilbâsiyle tefrîh ve mevkib-i dûdmân-ı Bektâşiyye olan mekâna tesrîh olundu. Cumʿa günü bu tertîb-i dil-firîb üzere Cebeci ve Topçu ve Top ʿArabacı ve Humbaracı ve Lağımcı [Ü1 226b] ocağları dahi Alay Köşkü altından geçüp, zavâbıt u ru'esâsına ilbâs-ı hilʿat-ı seniyye ve baʿzısına ihsân-ı ʿatıyye olunup, anlar dahi rû-be-râh-ı hayme-gâh oldular.