Tehakkuk-ı sefer-i bahr ü berr sebebi ile baʿzı vesâyâyı şâmil hatt-ı hümâyûn ve teşrîfât-ı mülâtafet-makrûn ile Serdâr-ı ekrem hazretleri [Ü1 225b] tevkīr olunmak ʿâdet-i Devlet-i ʿaliyye'den olmağla, işbu Zilkaʿde'nin beşinci günü Bâb-ı ʿâlî'de tertîb-i Dîvân kılınup, bi'l-cümle ricâl ve Ocağlu hâzır oldukları hâlde taraf-ı zâhirü'ş-şeref-i Husrevâne'den bir kıtʿa hatt-ı hümâyûn ve teşrîfât-ı seniyye şeref-resân-ı vürûd olup, hatevât-ı taʿzîm ile Sadrıaʿzam hazretleri istikbâl ve ferve-i semmûru zîver-i endâm-ı iclâl ve şemşîr-i Süreyyâ-cevher'i miyân-bend-i ikbâl edüp, baʿdehû hatt-ı hümâyûn ʿalâ-mele'i'n-nâs kırâʾat ve mefhûm-ı münîfine havâle-i semʿ-i dikkat olunup, hâvî olduğu cevâhir-i tâb-dâr-ı hikmet, kurt-ı gûş-i hûş-i ehl-i gayret olup, deymûmiyyet-i eyyâm-ı ʿömrü devlet-i Şâhî ve mansûriyyet-i asker-i Pâdişâhî edʿiyyesini tekrîr ve taraf taraf sadây-ı te'mîni felek-mesîr eylediler.