Defter-i Emîni olan Şerbetci dâmâdı Emîn Efendi Şaʿbân-ı şerîf'in yirmi altıncı günü hulûl-i ecel-i müsemmâsıyla vefât edüp, [Ü2 211a] vakt-i tevcîhât karîb olduğundan, mansıb-ı mezkûrun tevcîhi te'hîr olundu. Mûmâ ileyh Mâlikâne Halîfeliği'nden Defterdârlık mesnedine suʿûd ve bir sene kadar hidmet-i İstîfâ'da bezl ü cûd edüp, sinni mütenâhiz-i ʿakd-i sebʿîn olduğundan, şedâyid-i umûrda mütehammil olmayup, ʿazli bâbında dâmen-çîn ve takbîl-i [Ü1 195a] dâmen ü âstîn etmişidi. Baʿde'l-infisâl Tevkīʿî ve baʿdehû Defter Emîni olup, târîh-i mezkûrda terk-i ʿâlem-i fenâ ve ihtiyâr-ı semt-i ʿukbâ eyledi. Mûmâ ileyh kaleminde mütefennin ve defteri, küttâb beyninde müteʿayyin bir pîr-i sâff-zamîr idi.