Müşârun ileyhin Celâlî sûretinde olan etvârı ve bâgīyâne vazʿ u reftârı mukaddem ü mu'ahhar kalem-i ʿÂcizânem ile muharrer olup, bu hareket ile mazhar-ı kahr-ı Pâdişâh-ı ʿasr olacağı mukarrer idi. Müşârun ileyh neyistân-ı ahvâl-i fukarâya serkeş-i ʿalev ve hânumân-ı zuʿafâya [Ü1 190b] seylâb-ı tünd-rev, râyet-i tuğyânı şecere-i melʿûne-i fesâda şâh ve dâiresi haşerât-ı arza sûrâh olup, pâ-nihâde olduğu bilâd-ı maʿmûre vîrân u harâb ve merzbûm-ı Rum, zulmüyle âşiyâne-i bûm ve gurâb-ı nâhib ü vâhib, bâzil ü gāsıb bir şahıs olup, bu defʿa Pâsbân-oğlu'yla yek-cihet ve nihânî muhâbere ile Vidin Ordusu'nun ihtilâline ʿillet olmağla, letâyifü'l-hiyel iʿmâliyle Serʿasker Paşa tarafından [Ü2 206b] celb ü iʿdâm ve pençe-i şikencesinden tahlîs-ı girîbân-ı hâss u ʿâmm kılındı. Münhâll olan Rumeli Eyâleti, Boğaz muhâfazasına me'mûr Zihneli Hasan Paşa'ya ve Vidin vakʿasında cerîhan vefât eden Kürd ʿOsmân Paşa'nın terk eylediği Silistre Eyâleti, Niğbolu Sancağı Mutasarrıfı Vezîr Hüseyin Paşa'ya ve anın mansıbı Vezîr Seyyid Mustafa Paşa'ya tevcîh olundu.