Vidin Serʿaskeri Vezîr Hüseyin Paşa hazretlerine bundan akdem teşrîfât ve istiklâl-i emr-i şerîfi îsâl eden Şîrîn-zâde Esʿad Bey'in mükerrem olması menvî-yi zamîr ve Sakızlı Mehmed Ağa'nın ʿazli dahi hâtırda cây-gîr olduğuna binâʾen, mâh-ı mezkûrun on sekizinci günü mîr-i mûmâ ileyh Mîrâhûr-ı Sânî nasb olunup, Bostancı-başı İbrâhîm Ağa'nın dahi o hıdmete liyâkati maʿdûm ve bir müddetden berü ʿazli meczûm olduğundan, yevm-i mezkûrda mûmâ ileyh dahi maʿzûl ve Hasekî Ağa bulunan İsmâʿîl Ağa, yerine mevsûl oldu. Hubûbât Nâzırı Ahmed ʿAzmî Efendi'nin vakt ü zemânında olan temâdî, infisâline sebeb-i ʿâdî olup, Re'îsülküttâb-ı esbak Râsih Efendi şehr-i Safer'in yirmi ikinci günü o mansıb-ı refîʿ ile dest-zen-i bezm-i ferhat ü şâdî oldu.