Mora Vâlîsi Sadr-ı esbak Hasan Paşa pîr-i sâl-hûrde olup, rukûb u nüzûlden ʻâciz ve gışâve-i herem kendi umûrunun idâresine bile hâciz olup, bu hâl ile cezîre-i mezkûrede bulunması hazm ü ihtiyâta gayr-i muvâfık ve fetk u ratk erbâbından biri o havâlîde bulunmak hükm-i vakte mutâbık olduğundan, Mora Eyâleti, Haleb Vâlîsi el-Hâc Mustafa Paşa'ya tevcîh ve selefi istediği mahalde ikāmet etmek ruhsatı ile dağdağa-i Vezâret'den tenzîh olunup, Bahr-i sefîd Boğazı'na dahi bir Vezîr'in [Ü1 186b] lüzûm-ı taʻyîni zâhir ve Zihne'de Vezâret'i refʽiyle mukīm olan Seyyid Hasan Paşa kuvvet-i mâliyye ile müştehir ve cemʻ-i [Ü2 202a] askere muktedir olmağla, Vezâret'i ibkā ve Boğaz muhâfazası emri tarafına isrâ ve Karaman Vâlîsi Vezîr Mehmed Paşa'nın Kıbrıs muhâfazasına taʻyîni ve o havâlînin dahi istihkâm u tarsîni emr-i mühimm olduğundan, Karahisâr-ı sâhib Sancağı ilhâkıyla Kıbrıs muhâfazasına gönderilüp, İç-il Mütesellimi Ahmed Ağa'ya Mîr-i mîrânlık ve İç-il Sancağı tevcîh ve tedârük eylediği asker ile müşârun ileyhin maʻiyyetinde bulunması tenbîh olundu. Anadolu Vâlîsi ʻAli Paşa'nın kethudâsı olan Seyyid Mustafa Paşa'nın yararlığı nümâyân ve Vezâret'e şâyân olduğu Serʻasker Paşa tarafından ifâde vü beyân ve Kars Muhâfızı Nuʻmân Paşa'nın dahi etvâr-ı sütûdesi karʻ-ı semʻ-i erkân-ı devlet etmekle, ikisine dahi Rütbe-i Vezâret ihsân olundu. Ve Hanya Kalʻası'nın idâreye kādir Muhâfız'dan huluvvü resm-i hazma mugāyir olduğundan, sâbıkā Anapa Muhâfızı olup, İstanköy'de menfiyyen ikāmet üzere olan Köse Mustafa Paşa'nın dest-i hâdisât ile tebdîd olunan câme-i Vezâret'i tecdîd ve Hanya Sancağı tevcîhiyle bir ân akdem emr-i muhâfazaya lühûku te'kîd olunduğundan gayri, Haleb Muhassılı İbrâhîm Ağa'nın hıdmet-i Devlet-i ebed-müddet'de sadâkati âşikâr ve Vezâret'e sezâvâr olmağla, Rütbe-i Vezâret'le tevkīr ve çeşm-i ibtihâcı Şâm Eyâleti'yle tenvîr olunup, selefi Vezîr ʿAbdullah Paşa, Marʿaş Eyâleti ile vâreste-i hafakān-ı kalb u iztırâb ve birkaç gün mukaddem vefâtı haberi vürûd eden Cezâyir Beylerbeyisi Hasan Paşa yerine Hazîneci Mustafa Bey Mîr-i mîrânlık ile kâm-yâb oldu.