Efendi-yi mûmâ ileyh Reʾîsülküttâb-ı esbak Hacı Mustafa Efendi'nin mahdûmu ve sulehâdan Bıçakcılar İmâmı hafîdi olup, bin yüz elli altı târîhinde tevellüd ve pertev-i nısfu'n-nehâr-ı zekâ ile tevakkud edüp, ʿarazı cevherden ve halhâlı miğferden farka kudret-yâb oldukda, tahsîl-i ʿilm ü kitâbete dâmen-çîn-i ihtimâm ve mukaddimâtı tahsîl ile mâ-beyne'l-akrân benâm olup, Mektûbî Kalemi'ne müdâvim ve seksan ikide Kalem ile sefere ʿâzim olmuşidi. Sefer hıtâmına [Ü2 196b] karîb Ser-halîfelik ile [Ü1 181b] gusn-i ikbâli ratîb olup, bir zemândan sonra Sadrıaʿzam Mektûbçuluğu ile dil-şâd ve Halîl Paşa Sadâreti'nde dâyirelerine ez-kadîm müntemî olan Haremeyn Müfettişi Musullu ʿAli Efendi vefât edüp, baʿzı cihetlerini bilâ-istîzân evlâdına tevcîh eylediğinden, Sadrıaʿzam müşme'iz olup nefyini murâd etmişiken, tevassut-ı şüfeʿâ ile kayd-ı nefyden âzâd ve ʿazl ile dâyire-i Âsafî'den ibʿâd olunmuşidi. Baʿdehû Silahdâr Kitâbeti ile tatyîb ve Râşid Efendi, Reʾîs oldukda, Sâhib-i tercemeyi Beylikçilik ile Bâb-ı ʿâlî'ye takrîb eyleyüp, sefere maʿan ʿazîmet ve Hayrî Efendi vefâtında hıdmet-i Riyâset'le kesb-i şeref ü rağbet edüp, Nemçe ve Moskov musâlahalarına me'mûr ve hıtâm-ı maslahatda Âsitâne'ye gelüp, birkaç mâh murûrundan sonra sîne-çâk-ı garâm olduğu, şâhid-i zîbây-ı Riyâset'den mehcûr olup, bir müddetden sonra Büyük Rûznâmecilik ile müşerref ve Sadrıaʿzam Kethudâsı Bekir Ağa'ya halef olmuşidi. Etvârı muhâlif-i tabʿ-ı Sadr-ı ʿâlî olup, ʿazli mukaddimâtını temhîdden hâlî olmadığına binâʾen, ʿâkıbet ʿazl ile tekdîr “Ve men yesmaʿ yehal” mefhûmu üzere hakkında tefevvüh eylediği ekāvîl-i meşrebü'l-ʿazb hâtır-ı Mülûkâne'yi tagyîr edüp, bundan sonra Nişancı ve Beyhân Sultân Kethudâlığı'nda Burusa'ya iclâ ve baʿdehû sebîli ihlâ olunup, Âsitâne'ye geldikden sonra çok geçmeyüp, hulûl-i ecel-i mevʿûd ile terk-i bûd ve ne-bûd eyledi. Mûmâ ileyh istihrâc-ı ʿibâreye kādir ve nükât-ı edebiyyeyi halle muktedir, elsine-i selâsede şiʿr ü inşâ melekesine mâlik ve her hâlde tarîk-ı nasafet ü iʿtidâle sâlik, [Ü2 197a] sadâkat-kâr-ı dâyire-i Saltanat ve bende ve bende-zâde-i devlet idi; tecâvezallâhu ʿan seyyi'âtihî.