Mâl ve kalemiyyesi maʿlûm mukātaʿât-ı mîriyyeden [Ü2 192b] Hama ve Humus ve Maʿarratü'n-Nuʿmân ve kurâ ve mezâriʿ-i Hısnu'l-Ekrâd mukātaʿaları ʿan-asl külliyyetlü muʿaccelât ile Şâm vâlîlerine ber-vech-i Mâlikâne fürûht olunur iken, vülât-ı Şâm zikr olunan mukātaʿâtı bir müddetden berü bilâ-muʿaccele zabt u tasarruf eyleyüp, yüz bin guruş fâyiz takdîrine mütehammil mukātaʿalardan fâyide-i mîrî münkatıʿ olmak zarar u hasârı mûcib olup, şimdilik elli bir bin beş yüz guruş fâyiz takdîr ve bu meblağdan üç bin beş yüz guruş senevî idâre eyleyecek kimsenin mesârıfına tahsîs ve kusûrunun her bir kîsesi bir hisse iʿtibâr ve her hisse beş bin guruş muʿaccele ile ricâl ü nisvândan taleb-kâr olanlara fürûht olunmak ve mukātaʿât-ı merkūmenin emvâli mesârıf-ı hacc-ı şerîfe müretteb olmağla, beher sene Şâm vâlîleri tarafından zabt olunmak muvâfık-ı hâl olduğuna binâ'en, beher sene Şâm Vâlîsi ve Mîrü'l-hacc bulunanlara şurût-ı merʿiyyesiyle işbu mukātaʿât [Ü1 178a] der-ʿuhde vü ilzâm ve müstakıll berât verilmek ve kapu kethudâları evvel-be-evvel evkāt-ı muʿayyenede edâ ve teslîmine teʿahhüd edüp, kavî sarrâf göstermedikçe ilbâs-ı hilʿat olunmamak ve gayr ez-mâl ve kalemiyye takdîr olunan fâyizât emsâline kıyâsen senede iki taksîte rabt olunup, taksît-i evveli Haziran ve sânîsi Kânûn-ı evvel ibtidâlarında kaleminden verilecek sûretler ile ashâb-ı mukātaʿâta kapu kethudâları tarafından edâ olunmak ve zikr olunan hisselerin mahlûlâtı şurût üzere mîrîden fürûht olunup, âhara kasr-ı yedi dahi câyiz olmak ve hâsılât ü nemâsına nazaran vülât, fâyiz-i mukadderden ziyâde zamm eyledikleri hâlde zamîme-i mezkûre kezâlik hisse iʿtibârıyla fürûht olunmak [Ü2 193a] husûsları, karâr-gîr-i erbâb-ı tedbîr olup, ol bâbda hatt-ı hümâyûn şeref-yâfte-i sudûr ve işbu mukātaʿât bin iki yüz on iki senesi Mart'ı ibtidâsından iʿtibâr ile hâlâ Şâm Vâlîsi Vezîr ʿAbdullah Paşa'ya ilzâm olunduğunu müşʿir der-ʿuhde berâtı ve iʿlâm-ı hâl emri ve Baş-muhâsebe'ye ve Sehm Rûznâmçesi'ne ve Kapu Kethudâsı tarafına ʿilm ü haberleri iʿtâ olundu.