[Ü1 166a] İşbu sâl-i huceste-fâlde Bahr-i sefîd'e ihrâc olunan ince donanmaya ümerâ'-i deryâdan Mehmed Bey Başbûğ [Ü2 180a] nasb olunup, maʿiyyetinde olan tekneleri lâzım gelan mahallere tesyâr ve kendüsi dahi süvâr olduğu korvet ile Bekir Kapudanı refâkate ihtiyâr edüp, Kıbrıs sularında geşt ü güzâr eder iken, ʿale'l-gafle Maltiz korsanlarından “Seykel” nâm hurum-zâdenin sefînesine râst gelüp, mesfûr birkaç nefer kefere ile leylen firâr etmiş bulunduğundan, sefînesini derûnunda olan yirmi beş nefer Maltiz esîrleriyle zabt eylediği ve Rodos Mutasarrıfı Murâbıt-zâde Hasan Kapudan kendi fırkateynine Rodoslu Mehmed Kapudan'ı irkâb ve Barba-oğlu ʿAli Kapudan'ın süvâr olduğu sâlyânelü kırlangıc sefînesini maʿiyyetine terfîk ile Anadolu sevâhiline şukka-güşây-ı seyr ü zehâb etmişidi. Adrasan açıklarında “Nikola” nâm korsanın on dokuz topçeker bir kıt'a sefînesine tesâdüf edüp, kuvvet-i bâzû-yı celâdet ve nîrû-yı sâʿid-i himmet ile bilâ-meşakkat ü külfet zikr olunan sefîneyi yüz on yedi nefer Maltiz esîrleriyle rabt-ı vesâyık-ı mezellet ve işbu Cumâdelûlâ'nın beşinci günü zikr olunan kapudanlar akdarmalarıyla vâsıl-ı Âsitâne-i saʿâdet oldular. Zikr olunan üserâ hem-pâlarına mülhak kılınup, nehengân-ı deryây-ı savlet olan kapudânân ve neferât mazhar-ı ihsân-ı Şehriyâr-ı dârâ-heybet olduklarından gayri, kırk elli nefer melâʿîn ile bir kıtʿa Maltiz galeresi bir zemândan berü ʿArabistân sevâhilinde deverân ve adalara îsâl-i zarar ü ziyân eyleyerek katʿî çok cerîmleri zabt ve emvâl ü eşyâsını tâlân edüp, sefîne-i mezkûre sagīrü'l-cirm olduğundan, [Ü2 180b] ele getürülmesi müteʿazzir ve me'mûrlar bu bâbda mütekeddir olmuşlaridi. Geçen sene [Ü1 166b] cânib-i Mora'ya tertîb olunan sefâyinden bir kebîr fırkateyne Benefşeli Hasan Bey süvâr olup, Benefşe'nin on mîl açığında mesfûra râst gelüp, üzerine hecme-endâz-ı celâdet ve Çuka Adası'na dek verâsını boşlamayup, ʿâkıbet başdan kara eyleyerek birkaç nefer mellâh ile reh-gîrây-ı ʿazîmet olup, teknesi teshîr ve derûnunda olan on sekiz nefer Maltalu esîr kılınup, kapudân-ı merkūm akdarmasıyla vâsıl-ı Der-i devlet-medâr ve ʿatâyây-ı Şâhâne ile hâyiz-i rehîne-i mesârr oldu.