İnebahtı serhaddi Mora'nın kilîdi ve belki Rumeli'nin [Ü1 160b] sedd-i sedîdi olup, muhâfızlarına mahsûs îrâd-ı kadîmi vâfî ve idâre-i umûrlarına kâfî iken, baʿzı mahalleri mukātaʿa ve hâss kılınarak hukūk-ı dîvâniyyesi tenzîl ve bâkī îrâdı bu sebeble ekall-i kalîl ve Muhâfız bulunanlar dahi dâyirelerini îrâda tevfîk ve ancak yirmi otuz etbâʿ ile ikāmetleri tahkīk olunup, îrâdına kesret ve Muhâfız'ına kuvvet verilmek husûsu mukaddemâ erbâb-ı şûrâ miyânında müzâkere ve hazariyye-i kadîmesine bir mikdâr meblağ zamm ü ʿilâveden başka, Tırhala ve Eğriboz sancaklarında vâkiʿ baʿzı kazâlardan dahi müceddeden meʿâş tertîbi ile vâridâtı yüz yirmi kîseye iblâğ kılınmak husûsu karâr bulup, defteri tanzîm ve Rikâb-ı müstetâb-ı Husrevâne'ye takdîm ve tahsîl-i ruhsat ʿakabinde sûret-i nizâmı Dîvân Kalemi'ne kayd olunmuşidi. Bu esnâda İnebahtı Muhâfızı Mîr-i mîrân'dan ʿAbdullah Paşa vefât ve yeri hâlî kalmağla, livâ'-i mezbûrun vikāye-i şurûtuna muktedir bir şahs-ı mütebassırın emr-i [Ü2 174a] muhâfazada temekkün ü tekarruru lâzım gelmekle, Dergâh-ı ʿâlî kapucu-başılarından hâlâ Mora Muhassılı olan Mustafa Ağa'nın dirâyet ü rüşdü zâhir ve bu nizâmın istikrârına bâdî olacağı vârid-i hâtır olmağla, işbu Saferü'l-hayrın yirmi altıncı günü Mîr-i mîrânlık ile İnebahtı muhâfazası Ağa-yı mûmâ ileyhe tevcîh olundu. Niğde Sancağı'na mutasarrıf Kocabaş-zâde Ahmed Paşa'ya maʿiyyetinde olmak mülâbesesiyle Anadolu Vâlîsi ʿAli Paşa âhar mansıb recâ eylediğine binâʾen, Kili Muhâfızı Ahmed Paşa tasarrufunda olan Köstendil ile Niğde mübâdele olunup, Ada-i kebîr Muhâfızı Mîr-i mîrân Mahmûd Paşa dahi vefât etmiş bulunup, maʿiyyetinde olan ʿammî-zâdesi Ahmed Bey'i Rumeli Vâlîsi ve Vidin Muhâfızı hüsn-i terbiye ile tavsiye etmeleriyle, iltimâslarına binâ'en mîr-i merkūm Mîr-i mîrânlık ile Ada Muhâfızı [Ü1 161a] nasb ve Çorum Sancağı zammıyla tefrîh ve Aksaray Sancağı dahi Akkerman Muhâfızı ve Karesi Sancağı Mutasarrıfı Kayseriyyeli-zâde İbrâhîm Paşa ismine mülhakan tashîh olundu.