Anadolu Sadâreti'nden maʿzûl olup, fuhûl-i ʿulemâdan Müftî-zâde es-Seyyid Mehmed Efendi dakk-ı şeyhûhet ʿilletiyle işbu Saferü'l-hayrın on beşinci günü ders-i hayâtı itmâm ve makʿad-ı sıdka hırâm eyledi. Müşârun ileyh Antalya Müftîsi'nin oğlu olup, bin yüz on iki târîhinde revnak-bahş-ı ʿâlem-i şühûd ve giderek derece-i heyûlânîden ʿakl-i bi'l-meleke meblağına pâ-nihâde-i vücûd olup, pederinden mukaddimâta şurûʿ ve baʿdehû Burusa'ya gelüp, fazlı [Ü2 173a] şüyûʿ bulan ʿulemâdan telakkī-yi usûl ü fürûʿ edüp, altmış yedide Müderris ve doksan üçde Yenişehir Mevleviyyeti ile müteneffis olup, umûr-ı ʿâmmede râcil olduğundan, Yenişehir'e vâsıl oldukda, idâre-i mansıb edemeyüp, taʿyîn-i Nâyib ile Âsitâne'ye âyib olmuşidi. İki yüz târîhinde Mekke ve iki yüz beşde İstanbul ve iki yüz dokuzda Anadolu pâyeleriyle taltîf ve on bir senesi Muharrem'inde bi'l-fi'l [Ü1 160a] Sadâret-i Anadolu'yu teşrîf ve ba'de'l-infisâl irtihâl eyledi. Müşârun ileyh ebr-i midrâr-ı ʿulûm ve bahr-i zehhâr-ı mantûk u mefhûm, ʿulemây-ı ʿasrın üstâdı ve mezâyây-ı fünûnun nakkâdı, tahrîrine Râzî, râzı ve sıhhat-i takrîrine Kādî, hâkim ü kādî olup, emr-i dünyâdan fârigu'l-bâl ve tekellüfât-ı resmiyyeden âsûde-hâl bir ʿâlim-i müttekın ve bir fâzıl-ı mütefennin idi. ʿİlm ü fazldan min-külli'l-vücûh behre-yâb olduğu gibi eyyâm-ı zindegânîden dahi bâliğ-i nisâb-ı kemâl ve siniyy-i ʿömrü mütenâhiz-i ʿakd-i mi'e-i kâmile olduğu, vefâtından birkaç gün mukaddem mesmûʿ-ı sikāt-i ricâl olmuşdur; ceʿalehullâhu fî emânihî ve eskenehû buhbûhate cinânihî.