Belgrad Muhâfızı Vezîr Mustafa Paşa Rumeli Vâlîsi olup, o etrâfı [Ü2 169a] tathîre me'mûr olduğundan Belgrad, Vâlî'den hâlî kalup, Filibe hânedânından Fazlı Bey-zâde ʿOsmân Ağa'yı bin nefer segbân ile eğerçi Belgrad'a Kāyim-makām nasb etmişidi. Ancak me'mûriyyetinin gāyeti muhtâc-ı zemân olup, rüteb-i devletden ʿârî efrâd-ı nâs ile o serhadd-i cesîmenin idâresi müşkil ve bâ-husûs Belgrad halkı vücûd-ı vülâta me'lûf olup, vakʿ u iʿtibâr-ı devlete nâyil olmamış Mütesellim ve Kāyim-makām'ın emr ü nehyine gayr-i mütehammil olduklarından gayri, Zemun ve Varadin ve o havâlîde vâkiʿ emâkinde Nemçelü'nün ceneralleri mukîm olup, berü tarafdan iltizâm-ı resm-i tekābül lâzım geldiğini beyân ile ʿuhdesinde olan Semendire Sancağı'nın mîrîsi yine müşârun ileyhe maʿrifeti ile edâ olunmak üzere Ağa-yı mûmâ ileyh dahi Mîr-i mîrânlık tevcîhini istihsân etmekle, keyfiyyet lede'l-ʿarzı ve'l-ifâde recâsı karîn-i hayyiz-i müsāʿade olup, işbu Muharremü'l-harâmın on sekizinci günü şart-ı mezkûr üzere [Ü1 156b] mûmâ ileyhe Rütbe-i Mîr-i mîrânî erzânî kılındı.