Nûrî Bey tahrîr eylediği vekāyiʿde: “Bu sefînelerin tenzîli mahzâ Râşid Efendi'nin himmetiyle vücûda gelüp, hattâ Kapudan Paşa hazretleri ve sâyir ricâl-i Tersâne bu sefînelerin akreb-i ahyânda itmâm ve ʿale't-teʿâkub deryaya nüzülünü mümteniʿât-ı ʿakliyyeden ʿadd etmişleridi" demiş. Ümenây-ı Tersâne “İzâ hulliye ve tabʿahû” hod-be-hod bir çekeleve yapmak ellerinden gelmeyüp, bu makūle ʿazâyim-i umûr sarf-ı mâl-i mevfûr ile himem-i Pâdişâhî'ye mütevakkıf u mahsûr olduğundan gayri, mûmâ ileyhe Darb-hâne ve Îrâd-ı Cedîd ve serîʿu'l-husûl muhallefât [Ü2 162b] bedellerinden pey-der-pey havâlât ve nukūd verilüp, esbâb-ı me'mûriyyeti tekmîl ve muʿzılât-ı maslahatı [Ü1 150b] teshîl olunup, kendi iddihârı ve beyne'n-nâs şâyiʿ olan kadr ü iʿtibârı dahi hiss derecesinde maslahata mümidd ve bu vechile sefâyin-i mezkûre nüzûle müstaʿidd oldu. Hakīkat-i mâddeye nazaran cibâl-i râsiyât ve atvâd-ı şâmihâtdan kinâye olan dört kıtʿa sefînenin bir günde nüzûlü mahzâ te'yîd ü imdâd-ı âsumânî ve eser-i ikdâm ü himmet-i Husrevânî olup, bu bâbda Zeyd'in eli ve ʿAmr'ın medhali olmadığı bir emr-i celîdir. Hâl böyle iken mûmâ ileyhin tekmîl-i noksân sûretinde iddiâ eylediği saʿy ü gayret gayr-i zâyiʿ ve müddet-i emânetinde nâyil-i envâʿ-ı fevâyid ü menâfiʿ olduğundan başka, behâne-cû-yi lutf ü kerem olan Şehriyâr-ı mekârim-şiyem hazretlerinin dahi her cihetle mazhar-ı lutf ü niʿamları oldu.