İkdâm ü himmet-i Pâdişâh-ı İskender-haslet ile sâha-i Tersâne'de altmış altı zirâ bir kıtʿa üç enbârlı ve elli üç buçuk zirâ bir kıtʿa fırkateyn ve otuz dört zirâʿ bir kıtʿa şehtiyye ve bir kıtʿa korvet sefînesi inşâsına tevârîh-i muhtelife ile bed' ü mübâşeret ve süfün-i mezkûre itmâm olunduğu maʿrûz-ı Rikâb-ı Pâdişâh-ı husrev-himmet kılınmışidi. İşbu Şaʿbânü'l-muʿazzamın yirmi dördüncü Salı günü Sadrıaʿzam ve Şeyhülislâm hazerâtı ve huzûru muʿtâd olan sâyir ricâl, ʿale's-seher Tersâne'ye ʿazîmet ile kudûm-i meymenet-eser-i Şâhâne'ye taʿlîk-ı nazar ve o hilâlde zevrakçe-i Şehriyâr-ı İskender-siyer misâl-i hılâl-i felek, ahzar-ı etrâf u eknâfa pertev-pâş-ı zîb ü ferr oldukda, erbâb-ı istikbâl ber-vech-i istiʿcâl furza-i Tersâne'ye varup, Pâdişâh-ı deryâ-nevâl cümlesini iltifât-ı Mülûkâne ile hâyiz-i rehîne-i âmâl [Ü1 150a] buyurdukdan sonra, Kalyon-ı hümâyûn'larında âmâde kılınan mevkıʿa [Ü2 162a] pâ-nihâde-i şevket ü ikbâl oldular. Hulûl-i vakt-i muhtâr ile süfün-i mezkûreye vâhiden-baʿde-vâhidin küşâd verilüp, fazl-ı Rabb-i celîl ile ber-vech-i teshîl cümlesi rûy-i deryâya tenzîl olunup, duʿâ vü te'mîn ve zebh-i karâbîn ʿakabinde Sadriaʿzam ve Şeyhülislâm ve Kapudan Paşa hazerâtına kürkler ilbâs olunup, huzûr-ı hümâyûnda Tersâne emînlerine müşârun ileyhim hazerâtıyla kürk ilbâsı muʿtâd değil iken, taltîfen Tersâne Emîni bulunan Mehmed Râşid Efendi bu niʿmet-i celîle ile mugtenem ve huzûr-ı Pâdişâhî'de Kapudan Paşa'dan sonra telebbüs-i ferve ile mükerrem olduğundan gayri, otuz bin guruş ʿatıyye ile ser-i iftihârı müvâzî-yi felek-i muʿazzam kılındı. Devlet-i ʿaliyye'de sefâyin inşâsı zuhûrundan berü dört kıtʿa sefînenin akreb-i eyyâmda hıtâmı ve deryâya nüzûl ü ilmâmı mesmûʿ u meşhûd olmayup, mahzâ Pâdişâh-ı Dârâ-derbân hazretlerinin semere-i himmet ü ikdâmları olduğu bî-reyb ü gümândır.