Yeniçeri Ağalığı'ndan maʿzûl ve ibtidâ Mîr-i mîrânlık ve baʿdehû Vezâret'le nâyil-i eʿazz-i meʾmûl olan Kelleci ʿOsmân Paşa -ki İç-il ve Niğde sancaklarına mutasarrıf idi- işbu Receb-i şerîf evâyilinde ser-âzâd-ı ʿâlem-i fânî ve reh-rev-i mülk-i câvidânî olup, mutasarrıf olduğu İç-il Sancağı, Karaman Vâlîsi Vezîr Süleymân Paşa'ya ve Niğde Sancağı, Akşehir ve Karesi sancaklarına mutasarrıf olup, Akkerman muhâfazasında olan Kayseriyyeli-zâde [Ü2 160a] İbrâhîm Paşa'ya ilhâkan tevcîh ü ʿinâyet ve Akşehir Sancağı mûmâ ileyhden ifrâz ve Beyşehri Mutasarrıfı Ahmed Paşa, livâ'-i mezkûr ile ser-efrâz kılınup, münhall olan Beyşehri Sancağı, Bozkır Maʿdeni'ne ilhâk olunup, hazariyyesi Maʿden Emîni'ne îrâd kayd olundu. Ve Eyâlet-i Çıldır, mukaddemâ Şerîf Paşa'ya Vezâret'le ihsân olunup, müteʿahhid olduğu meblağı Darb-hâne'ye teslîm etmeyüp, o havâlîde mütemekkin kabâyil ile dahi hüsn-i muʿâşereti olmadığı ifâde olunduğuna binâ'en, Çıldır'dan tebʿîd ve Adana ile tehdîd olunmuşidi. Şerîf Paşa'nın deynini edâ şartıyla Dergâh-ı ʿâlî kapucu-başılarından ve Ahisha hânedânından Mehmed Sâbit Ağa'ya evâsıt-ı Receb-i şerîf'de eyâlet-i mezkûre Mîr-i mîrânlık ile tevcîh olundu.