Memâlik-i ʿAcem'e müstevlî olan Ağa Mehmed Hân ümerâsından Mehmed Sâdık Hân ve Caʿfer-kulı Hân taraflarından bu defʿa nâme-resleriyle vürûd eden mektûblarında mülk-i Horasan ber-vech-i âsân kabza-i tasarruflarına girdiği [Ü1 147b] beyânıyla, Lezgi kavminin hod-nâ-şinâslarından bir fırka, Rûsiyyelü'ye temâyül ile derbend ve o havâlîde neşr-i bezr-i şerr ve zîr-i destân-ı İrâniyân'ı mübtelây-ı şikence-i zarr eylediklerine binâʾen, kavm-i mezkûrun istîsâlleriyle müstenedleri olan Rûsiyyelü'nün o taraflardan izâhe vü ibʿâdı Hân-ı mûmâ ileyhin murâdı olmağla, Devlet-i ebed-müddet dahi resm-i yek-cihetîye riʿâyet ve Moskovlu üzerine hareket ile tehvîn-i maslahat etmek mâddesi bi'l-irâde tahrîr ü işâret olunmuş[idi]. Devlet-i ʿaliyye ile Rûsiyyelü ve Nemçelü miyânında berren ve bahran hudûs eden ceng ü cidâl niçe sâl temâdî vü ittisâl kabûl edüp, Devlet-i ʿaliyye teʿâvün ü tenâsur-ı agyârdan müstagnî olarak, himmet ü şevket-i Salta[na]t'ını izhâr ve o hilâlde Rûsiyyelü kemâl-i ʿacz ile mühâdeneye hâst-kâr olmuş bulunduklarından, cünûd-i İslâmiyye'yi irâhe ve reʿâyâ ve fukarâyı tekâlîf-i seferiyye [Ü2 159b] meşakkatinden izâha kasdıyla, ʿulemây-ı Saltanat-ı ʿuzmâ terk-i cidâlin meşrûʿiyyetini mutazammın fetvâ vermeleriyle, muktezây-ı şerʿ-i kadîm üzere mevâdd-ı musâlaha müzâkere ve terk-i muhâsama vü muhâvere olunmuşidi. el-Hâletü hâzihî nakz-ı ʿahd gayr-i meşrûʿ ve hılâf-ı şerʿ-i şerîf hareket memnûʿ olduğundan gayri, bu hılâlde bâb-ı husûmeti dakk, maslahat-ı devlete gayr-i evfak olduğu muhakkak olup, be-în-cümle Devlet-i ʿaliyye İrâniyân ile ʿakd eylediği musâlahada pâydâr ve resm-i yek-cihetî ve safvet-i icrâsında pâ-ber-cây-ı merkez-i istikrâr olduğu zemîninde merkūmların mektûblarına taraf-ı Sadâret-penâhî'den cevâb-ı bâ-savâb yazılup, nâme-resleri ircâʿ olundu.