Bin iki yüz yedi senesi Cumâdelûlâ'sının yirmi dokuzuncu gününden iki yüz [sekiz] senesi Cumâdelûlâ'sı gāyetine dek, ber-mûceb-i şurût Îrâd-ı Cedîd Hazînesi'nden zabt [Ü1 80a] olunan mukātaʿât-ı mîriyyenin fâyizi doksan dört bin dört yüz yirmi dört buçuk guruşa bâliğ ve beş senelik hisâbıyla muʿaccelesi dört yüz yetmiş iki bin yüz yirmi üç guruşa resîde olmağla, fîmâ-baʿd mahlûl ve hazîne-i mezkûreden zabt olunacak mukātaʿât-ı mîriyyenin muʿaccele hisâbına bakılmayarak iki yüz [sekiz] senesi Cumâdelâhıre'si gurresinden iʿtibâr ile sene-i sâbıkaya kıyâsen dört yüz yetmiş iki bin yüz yirmi üç guruş beher sene muʿaccele bedeli Îrâd-ı Cedîd Hazînesi'nden Hazîne-i ʿâmire'ye teslîm olunup, ancak bi'l-bedâhe masraf zuhûrunda Defterdâr-ı ʿasr olanlar maktûʿ-ı mezkûrun birkaç yüz kîsesini birden ahz u sarf eyledikde, Hazîne-i ʿâmire'nin mesârif-ı zarûriyyesinde müzâyaka çekileceği zâhir olmağla, meblâğ-ı mezbûru ʿaded-i şühûr-ı sene-i kâmileye taksîm ve beher şehre isâbet eden otuz dokuz bin üç yüz kırk üç buçuk guruş on dört akça, ol mâhın gurresinde Îrâd-ı Cedîd Hazînesi'nden nakl olunmak üzere bâ-telhîs sâdır olacak fermân-ı ʿâlî mûcebince Başmuhasebe sûretiyle Hazîne-i ʿâmire'ye teslîm olunmak ve nizâm-ı mezkûrun [Ü2 85a] muhâfazası eşhâs-ı mahsûsaya bâz-beste olmayup, giderek fâyizlere dikkat olunmayarak Îrâd-ı Cedîd'den zabtı lâzım gelen mukātaʿâtı hıdmet-i istîfâya meʾmûrlar fürûhta mecbûr olmak ve Îrâd-ı Cedîd Defterdârı bulunanlar o makūle mukātaʿâtı kable't-tashîh Îrâd-ı Cedîd'den zabtına tesaddî eylemek misillü şurûtun mugāyiri hâlât muhtemelü'l-vukūʿ olduğuna binâʾen, fîmâ-baʿd fesâd ü muʿârazadan muhâfaza sûretleri mülâhaza ve baʿde-ezîn ne makūle mukātaʿât mahlûl olursa, evvelen mezâd kāyimesi ihrâc ve mezâdı çekilmaksizin Îrâd-ı Cedîd Defterdârı'na gönderilüp, mûmâ ileyh [Ü1 80b] o mukātaʿanın fâyizini teharrî edüp, eğer hissesi topunun fâyizi on kîseden zâyid ise, ber-mûceb-i nizâm tarafından zabt olunmasiyçün mahalline kayd ve tarafına ʿilm ü haber verilmek ve eğer o mikdârdan dûn ise mezâdı çekilüp, li-ecli'l-müzâyede Dellâl-başı'ya verilmek hâsılı ʿalâ kile't-takdîreyn kāyimenin zahrına Îrâd-ı Cedîd Defterdârı işâret ve temhîr eylemek ve bir mukātaʿanın berâtı yapdırılup, baʿdehû hılâf-ı şurût fesâdı tehakkuk eyler ise, mezâd kāyimesi Kalem'e götürüldükde, berâtı verilmamek üzere bu mâdde dahi tanzîm ve sûret-i nizâmı lâzım gelan mahallere kayd u terkīm olundu.