Eyâlât askeri hakkında müceddeden tertîb olunan şurût ile kānûn-i cedîd vazʿından murâd nizâm-ı hâlleri olup, ez-cümle senevî hâsılâtı beşer yüz guruşdan nâkıs olan zuʿamâ ve erbâb-ı tîmâr kasr-ı yed ve mahlûl ü nâ-mevcûddan ilhâk ile senevîsi beşer yüz guruşa iblâğ olunması kānûn-nâmede muharrer ve bunların ʿale'l-ıtlâk hâsılâtı bilinüp, hâsılâtı kalîl olanlara ilhâk ʿarz olundukda, Defter-i Hâkānî kuyûduna lede'l-mürâcaʿa tevcîh içün mukaddemâ yoklamaya me'mûr olanlara zeʿâmet ve tîmârların hâsılâtı sancaklusu maʿrifetiyle tashîh ve mahalline kayd içün defteri irsâl olunmak yedlerine verilan evâmir-i ʿaliyyede tasrîh olunup, baʿzı elviyede Yoklamacı bulunanların vürûd ve Defter-hâne'ye kayd olunan hâsılât defterleri, mücerred sancaklusunun ihbârına mebnî olup, sıhhati üzere tahrîr ve defter olunmadığı tahkīk olunduğundan iştibâh ʿârız olup, şöyle ki, bir mahalle meʾmûriyyetlerinde meʾlûf oldukları vech üzere nân-pârelerinin kıllet-i hâsılâtından bahs ile aʿzâr-ı vâhiye îrâd eyleyecekleri zâhir ve hakīkat-ı mâdde refte refte tashîh olunmak muktezî olduğuna binâʾen, fîmâ-baʿd hasâddan mukaddem bilâ-veled fevtinden mahlûl olan zeʿâmet ve tîmârın [Ü2 84a] ʾarz olunan Mülâzım'a hâsılât-ı seneviyyesi bilinmek ve îrâd eyleyeceği aʿzâra cevâb bulunmak içün ol sene Îrâd-ı Cedîd Hazînesi tarafından zabt u idâre ve hâsılâtı tahkīk ve sene-i âtiye Mart'ından zabt etmek şartıyla tevcîh ve berât iʾtâ olunmak irâde olunmağla, baʿde-ezîn Dergâh-ı âlî Müteferrika ve Çavuş ve Enderûn-ı hümâyûn [Ü1 79b] gediklüleriyle Dîvân-ı hümâyûn ve Defter-i Hâkānî Kâtib ve Şâgird gediklüleri ve şerhlüleri ve eyâletlüden dahi hüsn-i rızâlarıyla kasr-ı yed ve gerek babaları fevtinden evlâdlarına ʿarz u tevcîh olunanlardan mâʿadâ cümle Eşkinci zuʿamâ ve erbâb-ı tîmârlar ile mütekāʿidînden bilâ-veled fevt olanların mahlûllerinden ve gerek nâ-mevcûdundan mülâzimîne tevcîhi ʿarz olunan zeʿâmet ve tîmârların ʾarzları buyurulup Kalem'e geldikde, tevcîhe geldiği senenin mahsûlü Îrâd-ı Cedîd Hazînesi tarafından zabt u ahz olunmak ve tevcîh olunacak kimesne sene-i âtiyesinden mutasarrıf olmak şartıyla tevcîh ve tahvîllerine böylece derc olunup, bu şartla tevcîh olunan nân-pârelerin hîn-i tevcîhlerinde baş kalemleri ve yazuları tasrîhiyle Îrâd-ı Cedîd Defterdârı tarafına ʿilm ü haberi verilmek ve mûmâ ileyh tarafından bir seneliği zabt ve mahsûlü kabz olunmak ve zabt olunan sene beyninde: “Vâkiʿ olan mahsûl, Mâbeyn mahsûlüdür” deyü miyâneciler ve gayrilerin iddiʿâlarına iʿtibâr olunmamak üzere hatt-ı hümâyûn-ı mevhibet-makrûn şeref-sudûr olmağla, bir sûreti tahrîriyle tezyîn-i ruhsâre-i sahâyif-i vekāyiʿ kılındı.