Müşârun ileyh Vezîr Sarı Mehmed Paşa'nın mahdûmu olup, bin [yüz] kırk bir târîhinde tevellüd ile altmış dokuzda müderris ve Şeyhülislâm-ı esbak ʿOsmân Monla'ya sıhrıyyet sebebiyle müteneffis olup, doksan birde ihde'l-mehâric olan Galata Mevleviyyeti'ne ʿâric ve doksan yedide Mısr-ı Kāhire ve iki yüzde Medîne-i münevvere Kazâsı'yla mübtehic ve iki yüz üçde İstanbul ve Anadolu Kadıʿaskerliği pâyelerine nakd-i emeli râyic olup, iki yüz sekizde bi'l-fiʿl Anadolu Kadıʿaskerliği'ne nâyil ve iki yüz dokuzda Rumeli Sadâreti Pâyesi'yle tarîkını müstekmil olup, târîh-i mezkûrda ityân-ı yakīn ile katʿ-ı nefes-i vâpesîn eyledi. Müşârun ileyh mutasaddır ve vakūr ve kesret-i teceşşüʿ ile meşhûr, ümmî, sâde-dil ve ebnây-ı cinsi beyninde mâ-bihi [Ü2 72b] 'l-imtiyâz olan ʿilm ü maʿrifetden bi'l-külliyye hâlî vü ʿâtıl idi.