Harîk ıtfâsiyçün birkaç mahalde havz inşâsı bundan akdem bi'l-müzâkere karâr-gîr-i nizâm ve lede'l-iktizâ nefʿ ü fâyidesi meşhûd-ı hâss u ʿâmm olup, zikr olunan havzların hîn-i binâsında birer muʿtemed âdem me'mûr ve Kum-kapu dâhilinde vâkiʿ Ermeni Kilisası kurbünde binâ olunacak havzın nezâreti dahi Ser-miʿmâr Nûrullâh Ağa'ya mahsûr kılınmışidi. Mûmâ ileyh tesvîlât-ı Ermeniyân ile ʿarz olunan hemyâna şîfte vü dîvâne olup, tevsîʿ-i kilisa misillü bir emr-i mekrûha mütecâsir ve giderek bu haber-i müstetir beyne'n-nâs müştehir olup, binây-ı mezkûr der-ân-sâʿat tahrîb ve mûmâ ileyh [Ü2 69b] Sinob'a nefy ü tagrîb olunup, sâbıkā Miʿmâr-ı Hâssa Mehmed ʿÂrif [Ü1 66b] Efendi Şaʿbân'ın on beşinci günü kemâ-kân hıdmet-i mezkûreye takrîb olundu.