Rumeli taraflarında ʿalem-efrâz-ı bağy ü şekā olan dağlu nâ-bekârlarına [Ü1 42a] bir müddetden berü taʿyîn olunan vüzerâ ve ümerâ indifâʿ-ı mazarratlarıyla tathîr-i etrâf u enhâ edemeyüp, kimi nefsâniyyete tebaʿiyyet ve kimi tûl-i zemân meʾmûriyyetini vesîle-i bekā-yı refâhiyyet ittihâzıyla taʿtîl-i maslahat-ı devlet eyleyüp, gitdikçe zarar u ziyânları efzûn ve eşk-i çeşm-i fukarâ mânend-i Ceyhûn olup, o makūle ashâb-ı agrâzın bu meʾmûriyyetden insırâflarıyla, perverde-i niʿam-ı devlet bir sâhib-i gayretin Vezâret'le meʾmûriyyeti bu dâ'in bür'üne ʿillet olacağı ihtimâli, pîrâmen-güzâr-ı havâtır-ı erbâb-ı fikret olmağla, sâbıkā Sadrıaʿzam Kethudâsı Hakkı Mehmed Beyefendi'de mehâyil-i rüşd ü reviyyet ve âsâr-ı merdânegî vü gayret zâhir ü bedîd ve bu fesâd-ı münteşirü'l-bilâdın hüsn-i sîret ü siyâsetle bi'l-külliyye zâyil olacağı mukaddimâtı huzûr-ı Şehriyâr-ı bâhirü't-teʾyîdde temhîd olunup, savâb-dîd-i erbâb-ı reʾy-i sedîd üzere ruhsat-ı seniyye-i Cihân-bânî levha-tırâz-ı zuhûr olup, şehr-i mezkûrun on dokuzuncu günü Bâb-ı ʿâlî'ye daʿvet ve Rumeli Eyâleti'yle tevcîh-i câh-ı Vezâret olunduğundan gayri, müstakıllen ve münferiden bu emr-i ehemme meʾmûriyyeti yedine verilan emr-i celîlü'ş-şân ile neşr ü iʿlân ve takviye-i bâzû-yı iktidârı zımnında hazîne-i mevâhib-i defîne-i Cihân-bânî'den müşârun ileyhe yüz elli bin guruş ihsân olundu. Nefîr-i ʿâmm askeriyle hıtâm-ı kâr müteʿazzir ü düşvâr olduğu bi't-tecribe maʿlûm-ı uli'l-ebsâr olmağla, Devlet-i ʿaliyye'nin mücerrebü'l-etvâr askeriyle dâmen-i maslahata teşebbüs lâzım gelüp, binâʾen-ʿalâ [Ü2 44a] -zâlik müşârun ileyhin maʿiyyetine bir Orta Muʿallem Topçu ve bir Orta ʿArabacı ve neferâtıyla iki nefer Humbaracı Halîfesi taʿyîn ve kendüsi bizzât Edirne'de mekîn olup, iʿmâl-i fikr-i rezîn ile muhâfaza-i yesâr ü yemîn etmek üzere bin nefer piyâde ile Koca-ili Mutasarrıfı [Ü1 42b] Hüseyin Paşa ve beşer yüz nefer ile iki Delîl-başı ve Kara ʿOsmân-zâde ve Çapân-zâde taraflarından biner nefer süvârî münâsib başbûğlar ile maʿan Rumeli'ye geçüp, emr ü re'yi üzere harekete kıyâm ve delîl-başılarının biri meʾvây-ı eşkıyâ olan Dimetoka'da ve dîgeri Gümülcine'de ârâm ve bundan başka Rumeli tarafında bulunan Karslı ʿAli dimekle meşhûr Delîl-başı dahi celb olunup, ol dahi beş yüz nefer ile Filibe'de ve Çirmen Mutasarrıfı Pilâslı Mehmed Paşa iktizâsı kadar piyâde ile Hasköy'de ikāmet edüp, eşkıyâyı ihâta ve taraf taraf mazarrat u hasâretlerin izâle vü imâta etmeleri zımnında evâmir-i ʿaliyye ısdâr ve taraflarına tesyâr ve menşeʾ-i fesâd olan aʿyân gürûhunun hâllerine ıttılâʿ ve mesmûʿât u maʿlûmâtların müşârun ileyh tarafına iʿlâm ü ismâʿ etmek içün kazâlara birer Hasekî meʾmûr kılınup, müşârun ileyh dahi esbâb-ı Vezâret ve sâyir levâzımını ru'yet ile harekete âmâde olduğunu Bâb-ı ʿâlî'ye ifâde etmekle, Şaʿbânü'l-muʿazzamın on üçüncü İsneyn günü alayını tertîb ü tanzîm ve maʿiyyetine meʾmûr olup, mukaddemce vürûd eden askeri takdîm ile Dâvud-paşa Sahrâsı'na vusûl buldukda, alayını seyr ü temâşâ içün veliyy-i niʿam-i ʿâlem-i Şehriyâr-ı İskender-hadem hazretleri, Dâvud-paşa Serâyı'na sâye-endâz-ı iclâl buyurmuş olmalarıyla, müşârun ileyhi lutfen ve keremen huzûr-ı [Ü2 44b] mevâhib-mahsûr-ı Mülûkâne'lerine ihzâr ve şeref-i muhâtabât-ı Mülûkâne'lerine sezâvâr buyurdukdan sonra, bir kabza hançer-i girân-behâ ile kadri terfîʿ ve ʿatıyye-i hümâyûn olarak maʿiyyetinde olan askere on beş bin guruş nisâr ü tevzîʿ olundu. Sâbıkā Rumeli Vâlîsi Seyyid Mustafa Paşa'ya Eğriboz Sancağı ve Silâhdar Mustafa Paşa'ya Selânik Sancağı [Ü1 43a] eğerçi tevcîh olunmuşidi. Ancak Seyyid Mustafa Paşa, Rumeli Eyâleti'nden munfasıl olup ve o havâlî ile münâsebeti dahi maʿlûm olmağla: “Rumeli taraflarında bulunması bu meʾmûriyyet-i ʿazîmeyi ihlâl ü ifsâd eyleyeceği, vâridât-ı hâtırdandır" deyü Hakkı Paşa inhâ ve Sakız Cezîresi'ne iclâsını istidʿâ etmekle, istidʿâsı müsâʿadeye makrûn ve Eğriboz Sancağı'yla Mîr-i mîrân'dan Caʿfer Paşa memnûn kılındı.